१४ भाइको मुद्दा ‘हेर्दाहेर्दै’ मा, अर्को पेशी भोलि

पार्टी छोडेका १४ सांसदको पद खुस्काउन माग गर्दै नेकपा एमालेले सर्वोच्च अदालतमा दायर गरेको रीटमाथिको सुनुवाई ‘हेर्दाहेर्दै’मा परेको छ । न्यायाधीशद्वय दीपक कार्की र कुमार चुडालको बेञ्चमा परेको आजको सुनुवाई नसकिएपछि ‘हेर्दाहेर्दै’मा राखिएको हो।

एमाले अध्यक्ष खड्कप्रसाद शर्मा ओलीले माधव नेपालसहित १४ जनालाई गरिएको कारवाही कार्यान्वयन गराउन माग गर्दै रिट हाल्नुभएको थियो । रिटमा एमालेले कारवाही गरेका १४ जना सांसदसहितको सनाखत गराएर नयाँ पार्टी दर्ता गर्ने निर्वाचन आयोगको निर्णय बदर गर्न अन्तरिम आदेशसमेत माग गरिएको छ ।

यसअघि प्रधानन्यायाधीश चोलेन्द्र समशेर राणाको एकल इजलासले भदौ २२ गते १४ जना सांसद र रिट निवेदक पक्षलाई बोलाउन आदेश गरेको थियो । साथै विपक्षीका नाममा कारण देखाऊ आदेश जारी गरेको थियो । तर, भदौ २८ गते न्यायाधीशद्वय कार्की र मीरा खड्काको इजलासमा पेशी चढे पनि सुनुवाई स्थगित भएको थियो ।

साउन २५ गते बसेको एमाले केन्द्रीय कमिटीको बैठकले १४ साँसदलाई पदबाट हटाउने निर्णय गरेको थियो । सोहिअनुसार १ भदौमा सँसद सचिवालयमा समेत निश्कासनको पत्र दर्ता भएको थियो ।

तर, भदौ २ गते माधव नेपालको नेतृत्वमा निर्वाचन आयोगमा नेकपा एकीकृत समाजवादी पार्टी दर्ताको निवेदन परेपछि सभामुखले कारवाहीको सूचना टाँस्नु भएको छैन । त्यसैलाई लिएर एमालेले संसद अवरोध गरिरहेको छ ।