८ वर्षअघि बेचिएकी युवती फर्किइन्, बेच्ने महिला समातिइन्
१३ वर्षीया बालिकालाई आठ वर्षअघि भारतमा बेचेकी महिलालाई सुर्खेतको भेरीगंगाबाट पक्राउ गरिएको छ । ५० वर्षीया ती महिलालो ८ वर्षअघि १३ वर्षीया बालिकालाई भारतमा लगेर बेचेकी हुन् ।
प्रहरीले बालिका बेच्ने महिलालाई भेरीगंगा नगरपालिका–६ बाट समाती सार्वजनिक गरेको हो । उनले २०७१ जेठ १८ गते गुर्भाकोट नगरपालिका–९, सुर्खेतकी १३ वर्षीया बालिकालाई ललाइफकाई भारत पुर्याएर बेचेकी थिइन् ।
ती महिलाको योजनामा उनकै छोरीले भारतमा राम्रो जागिर लगाइदिने प्रलोभनमा बालिकालाई ललाइफकाई गरी नयाँ दिल्ली पुर्याएर बेचबिखन गरेको खुलेको छ । पीडित बालिका बेचिएको ठाउँमा १५ महिना बसेको र पछि त्यहाँबाट भागेर मुम्बई पुगेको बताइन्छ ।
जिल्ला प्रहरी कार्यालय सुर्खेतका प्रवक्ता रामप्रसाद घर्तीका अनुसार बेचिएको आठ वर्षपछि पीडित बालिका अहिले युवती उमेरमा भारतबाट भदौ २३ गते घर फर्केकी हुन् ।
उनी घर फिर्नुअघि नै बालिका बेचबिखन गर्ने ती महिलाविरुद्ध गुर्भाकोट नगरपालिका–९ की ५८ वर्षीया अर्की महिलाले २०७७ माघ २६ गते सुर्खेत प्रहरीमा बालिका बेचबिखनको जाहेरी निवेदन दिएकी थिइन् ।
त्यहि जाहेरीका आधारमा महिलालाई पक्राउ गरी आवश्यक अनुसन्धान र कारबाही प्रक्रिया अघि बढाइएको बताइएको छ ।
टिप्पणीहरू