एमालेले गरिमा जोगाउन आज पनि संसद अवरुध्द गर्ने
सभामुख अग्निप्रसाद सापकोटाले सभामुखभन्दा बढी माओवादी कार्यकर्ताको भूमिका निभाएको भन्दै मुख्य विपक्षीदल नेकपा एमालेले आज पनि संसद अवरोध जारी राख्ने भएको छ । सोमबार सभामुख सापकोटाले बोलाउनुभएको सर्वदलीय बैठकसमेत बहिष्कार गरेको एमालेले आज पनि संसद अवरोधलाई जारी राख्ने बताएको हो ।
एमालेले आफूले कारबाही गरेका भनिएका १४ जना सांसदलाई पदमुक्त गर्नुपर्ने वा सो गर्न नसके सभामुख आफैँले राजीनामा दिनुपर्ने माग राखेको छ । मुख्य विपक्षी दलले माधवकुमार नेपाल सहितका १४ सांसदलाई कारबाही गरेको पत्र संसद सचिवालयमा १३ दिनसम्म त्यत्तिकै थन्काएर राखेको र एमाले फुटाउने मतियारको रुपमा काम गरेको आरोप सभामुख सापकोटामाथि लगाउँदै आएको छ ।
प्रतिनिधिसभामा एमाले सचेतक शान्ता चौधरी आफ्नो पार्टीको मागबमोजिम कारबाही प्रक्रिया अगाडि नबढाएसम्म संसद चल्न नदिने अडानमा पार्टी रहेको बताउनुहुन्छ । सापकोटाले सभामुखको गरिमा कायम राख्ने कि माओवादी कार्यकर्ता मात्रै बन्ने भन्नेसम्बन्धमा छिटो टुङ्गो लागाउनुपर्ने र यसको निर्क्यौल गर्नुपर्ने बेला आएको चौधरीको भनाइ छ ।
उहाँले भन्नुभयो, ‘ अहिलेसम्म सभामुख माओवादी कार्यकर्ताभन्दा माथि नउठेकाले एमाले गरिमामय संसदमा सहज तरिकाले उपस्थित हुन नसकेको हो ।’
टिप्पणीहरू