जुम्लाको अस्पतालमा बिग्रेका उपकरण बन्ने भयो
कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा रहेका विभिन्न उपकरणहरूको अवस्था बुझ्न तथा बिग्रेका बनाउन राष्ट्रिय आविष्कार केन्द्रको प्राविधिक टोली जुम्ला पुगेर काम थालेको छ ।
कर्णाली प्रतिष्ठान जुम्ला पुगेको राष्ट्रिय आविष्कार केन्द्रका बायो मेडिकल इञ्जिनियर सञ्जयबहादुर सिंह र उमेश किराँतीलगायत ७ जनाको टोलीले प्रतिष्ठानका विभिन्न उपकरणको अवस्था अवलोकन तथा मर्मत सम्भार गरेका हुन् ।
कर्णाली स्वास्थ्य विज्ञान प्रतिष्ठानका बायोमेडिकल इन्जिनियर अर्जुनबहादुर सिंहले दुर्गमका अस्पतालहरूको उपकरण मर्मत तथा अवलोकनका क्रममा सुर्खेत, कालिकोट हुँदै आविष्कार केन्द्रको टोली जुम्ला पुगेको बताउनुभएको हो ।
उहाँले जुम्ला पुगेको टोलीले प्रतिष्ठानका अक्सिजन कन्सन्ट्रेटर तथा ल्याबका गरी दुई तीन वटा उपकरण मर्मत गरिसकेको उल्लेख गर्नुभयो । ‘आइसियु, भेन्टिलेटर, ल्याब, ओटी, भिडियो, अडियो एक्सरेलगायतका विभिन्न मेशिनरी उपकरणको अवलोकन गरेको’ बताइएको छ ।
राष्ट्रिय आविष्कार केन्द्रको प्राविधिक टोली जुम्लामै पुगेर उपकरण मर्मत, अवलोकन तथा आवश्यक ज्ञान दिएकोमा धेरै राहत मिलेको समेत प्रतिष्ठानका बायोमेडिकल इन्जिनियर सिंहको भनाइ छ ।
दुर्गममै पुगेर यसरी उपकरणको मर्मत गर्दा कर्णाली प्रतिष्ठानलाई ठूलो राहत भएको प्रतिष्ठानका प्रवक्ता डा.रमेश भट्टराईले जानकारी दिनुभयो ।
अस्पतालका निर्देशक डा. राजीव शाहले आविष्कार केन्द्रको प्राविधिक टोली जुम्ला आउँदा कर्णाली प्रतिष्ठानलाई धेरै लाभ पुग्ने बताउनुभयो ।
टिप्पणीहरू