एमाले छोड्न चाहने सांसदलाई तत्काल केही नगर्न सर्वोच्चको आदेश

सर्वोच्च अदालतले नेकपा एमाले छोडेर नेकपा (एकीकृत समाजवादी) मा लाग्न चाहेका सांसदहरुलाई तत्काल कुनै कारवाही नगर्न विपक्षीका नाममा आदेश दिएको छ ।

एमालेबाट विभाजित भएर गठन भएको नेकपा एकीकृतमा लाग्न पाउँ भन्दै सांसदहरु सोमप्रसाद पाण्डे र शारदा भट्टले दायर गरेको रिट निवेदनमाथि सुनुवाई गर्दै आज न्यायाधीश मीरा खड्काको एकल इजलासले भदौ २९ गतेसम्मलाई दुबैमाथि कारबाही नगर्न अल्पकालीन अन्तरिम आदेश दिएको हो । साथै सोही दिन दुवै पक्षलाई छलफलमा झिकाउन पनि आदेशमा भनिएको छ ।

एमालेबाट बिद्रोह गरी माधव नेपालको नेतृत्वमा दल दर्ताका लागि शुरुमा निर्वाचन आयोगमा दिएको निवेदनमा नाम छुटेका पाण्डे र भट्टले पछि सनाखत गर्न पुगेका थिए । तर,शुरुको निवेदनमा नाम नभएको भन्दै आयोगले सनाखत गराउन अस्वीकार गरेको थियो।

त्यसपछि नेकपा (एकीकृत समाजवादी) मा सनाखत गराउन माग गर्दै उनीहरु रिट लिएर सर्वोच्च पुगेका हुन् ।