२९ गतेसम्म कारबाही नगर्न एमालेलाई सर्वोच्चको आदेश

नेकपा एमाले छाडेर नेकपा एकीकृत समाजवादीमा प्रवेश गर्न खोजेका दुई जना सांसदलाई तत्काल कारबाही नगर्न सर्वोच्च अदालतले अल्पकालीन अन्तरिम आदेश दिएको छ । अदालतले दुबै पक्षलाई भदौ २९ गते उपस्थित हुन आदेश दिएको हो ।

एमालेको तर्फबाट पाल्पाबाट प्रत्यक्ष निर्वाचित सांसद सोम प्रसाद पाण्डे र राष्ट्रिय सभाकी सांसद शारदा देवी भट्टलाई २९ गतेसम्म एमालेले कारबाही गर्न नपाउने भएको छ । न्यायाधीश मिरा खड्काको एकल इजलासले उक्त आदेश गरेको हो ।

पाण्डे र भट्टविरुद्धको मुद्दामा आदेश एमालेको पक्षमा आए तुरुत्तै कारबाही गरेर हटाउने तयारी एमालेको रहेको बताइन्छ । तर एमालेको तयारी विपरीत सर्वोच्च अदालतले दुवै पक्षलाई २९ गते छलफलमा सहभागी हुन आदेश जारी गरिदिएको हो ।

उता कर्मचारी सञ्चय कोषका प्रमुख प्रशासक तुलसीप्रसाद गौतमले सरकारविरुद्ध दायर गर्नुभएको मुद्दा आज पनि सरेको छ । प्रधानन्यायाधीश चोलेन्द्र शमसेर राणा र कुमार रेग्मीको संयुक्त इजलासले हेर्ने भनिएको मुद्दा आज हेर्न नभ्याइएको बताइको छ ।

यसअघि न्यायाधीश बमकुमार श्रेष्ठको एकल इजलासले गौतमलाई हटाउने सरकारी निर्णयविरुद्ध अन्तरिम आदेश दिएको थियो ।