एमाले छोड्न पाऊँ भनेर हालिएको मुध्दाको सुनुवाई हुँदै

आफ्नो दलीय हैसियत नेकपा एमालेको नभई नेकपा एकीकृत समाजवादी पार्टीमा हुनुपर्ने मागदावीसहित परेको रिटमाथि अहिले सर्वोच्च अदालतमा सुनुवाई हुँदैछ ।

एमालेबाट बिद्रोह गरी नेकपा एकीकृत समाजवादीमा लागेका पाल्पाका सोमप्रसाद पाण्डे र सुदूरपश्चिमकी शारदादेवी भट्टले दल रोज्न पाउने आफूहरुको अधिकार कुण्ठित भएको भन्दै हालेको रिटमाथि न्यायाधीश डा. आनन्दमोहन भट्टराईको इजलासमा सुनुवाई हुने भएको हो ।

एमालेमा विभाजनपछि आफूहरुले नेकपा एकीकृत समाजवादीमा सनाखत गर्न खोज्दा निर्वाचन आयोगले नदिएको भन्दै उनीहरुले सर्वोच्चमा रिट हालेका हुन् । रिटमा आफ्नो विवरण एकीकृत समाजवादीमा अद्यावधिक गराउन आदेश माग गरिएको छ ।एमाले विभाजनका बेला प्रारम्भमा निर्वाचन आयोगमा बुझाइएको निवेदनमा हस्ताक्षर नगरेका पाण्डे र भट्ट सनाखतको बेला आयोग कार्यालय पुगेका थिए । तर, आयोगले कानुनी अड्चन देखाउँदै उनीहरूको सनाखत लिन अस्वीकार गरेको थियो।

एमाले केन्द्रीय सदस्य रहनुभएका पाण्डे नेकपा एसका अध्यक्ष माधव नेपालका सम्धीसमेत हुन् । भट्ट एमालेबाट निर्वाचित राष्ट्रियसभा सांसद हुन् ।