एमसीसी उपाध्यक्षको टोलीलाई माधव नेपालको जवाफ

आज बिहान काठमाडौं उत्रेलगत्तै भेटघाटमा व्यस्त एमसीसी उपाध्यक्ष फातिमा सुमारले नेकपा एकीकृत समाजवादीका अध्यक्ष माधवकुमार नेपालसँग साँझ सिंहदरबारमा भेटवार्ता गर्नुभएको छ । एकीकृत समाजवादीका पाँच जना नेता सम्मिलित टोलीसँग एमसीसीले करिब डेढ घण्टा कुराकानी गरेको थियो ।

भेटवार्तामा सहभागी नेता गंगालाल तुलाधरका अनुसार एमसीसी टोलीले नेपाल सरकारले सोधेका लिखित प्रश्न र अन्य धेरै पक्षबारे प्रष्टाएको थियो । उहाँले भन्नुभयो,‘हामीले पनि धेरै प्रश्न गर्यौं । उहाँहरुले धेरै कुरा स्पष्ट पार्ने कोशिस गर्नुभयो ।’

नेता नेपालले उपाध्यक्ष सुमारलाई दिएको जवाफ उद्धृत गर्दै एकीकृत समाजवादीका एक जना नेताले भने, ‘चार वर्षदेखि थाती रहेको विषय हो यो । अहिले गठबन्धन सरकार छ । हामी मात्र होइनौं,अरु चार दलसँग पनि कुरा गर्नुपर्ने अवस्था छ । नेपाली जनतासँग प्रत्यक्ष जोडिएको विषय भएकाले नेपाल र नेपाली जनताको हितमा छ भन्ने कुरो तपाईंहरु नेपाल आएको बखत अरुलाई पनि सुनिश्चित गराइयोस् ।’

नेकपा समाजवादीबाट पनि उनीहरुले धेरै अपेक्षा गरेको कतिपय जिज्ञासाबाट नै प्रष्ट भएको ती नेताको भनाई छ । एमसीसी टोलीले नेपाली जनताको हितमा रहेको कुरो बारम्बार दोहोर्याएको थियो । उनीहरुले पटक पटक ‘हामी कुनै पनि हिसाबले दबाब दिने आशयले नेपाल आएका होइनौं’ भन्दै अमेरिकी धारणालाई प्रष्ट पारेका थिए ।

नेकपा समाजवादी टोलीले राष्ट्रहितभन्दा पर गएर केही पनि गर्न नसकिने टिप्पणी पटक पटक गरेको थियो । कुराकानीको क्रममा यो विषयलाई पेचिलो बनाउनेमा कतिपय अमेरिकी अधिकारीहरु पनि जिम्मेवार रहेको सन्दर्भ उठेको थियो । विगतमा उनीहरुले अनावश्यक ढंगले दिएको प्रतिक्रियाले विषय कचल्टिन पुगेको समेत अमेरिकी टोलीलाई जानकारी गराइएको बताइन्छ ।