भारतीय तिब्बती सीमा प्रहरीको क्याम्पमा सयौंलाई क्वारेन्टाइन

अफगानिस्तानबाट उध्दार गरेर भारत ल्याइएपछि भारत तिब्बती सीमा प्रहरी (आईटीबीपी) को छावला क्याम्पमा राखिएका २४ जना भारतीय र ११ जना नेपाली नागरिक आ-आफ्नो घर गएका छन् ।

उनीहरु १४ दिनको क्वारेन्टाइन पूरा गरेर बाहिरिएको बताइएको छ । योसँगै संस्थागत क्वारेन्टाइनको लागि आईटीबीपीमा राखिएका कूल १ सय १३ जना व्यक्ति त्यहाँबाट हिँडेका हुन् ।

पिसिआर परीक्षणमा नतिजा नेगेटिभ आएपछि सेप्टेम्बर ७ मा ५३ अफगान नागरिकसहित ७८ जना आईटीबीपीको क्वारेन्टाइन सेन्टरबाट बाहिरिएका थिए । सेन्टर राजधानी नयाँ दिल्ली नजिकै छ ।

उनीहरुलाई अगष्ट २ मा अफगानिस्तानबाट उद्धार गरी नयाँ दिल्लीको इन्दिरा गान्धी अन्तर्राष्ट्रिय विमानस्थलबाट सोझै आईटीबीपी क्वारेन्टाइन केन्द्रमा पुर्याइएको थियो ।

त्यहाँ उनीहरुलाई खाना र बस्नको आवश्यक व्यवस्थापन मात्र गरिएको थिएन मनोरञ्जन, इण्डोर खेल,वाईफाई र क्यान्टिनको समेत सुविधा प्रदान गरिएको बताइन्छ ।

यसैगरी योग र तनाव परामर्श कक्षा पनि उक्त अवधिभर आईटीबीपीका तनाव सल्लाहकारबाट दिइएको थियो । आईटीबीपीलाई भारतको पहिलो १ हजार बेडसहितको क्वारेन्टाइन केन्द्र मानिएको छ ।

जसले बंगलादेश,चीन,म्यान्मार, माल्दिभ्स,अमेरिका,दक्षिण अफ्रिका,मादागास्कर र अफगानिस्तानका ४२ जना नागरिकसहित १ हजार २ सय भन्दा बढीलाई क्वारेन्टाइनमा राखेको थियो ।

उनीहरुलाई विश्वका विभिन्न ठाउँ विशेष गरी चीनको वुहान र इटालीको मिलानबाट जनवरीदेखि गत मेसम्म उध्दार गरिएको समाचारमा जनाइएको छ ।