रोकियो प्रधान सेनापतिलाई डोरीले तान्दै गेटबाहिर निकाल्ने चलन

भदौ २४ गते बिहिवार कार्यकाल सकिएर औपचारिक बिदाइको तरखरमा रहनुभएका प्रधानसेनापति पूर्णचन्द्र थापाले हिजो साँझदेखि भद्रकालीस्थित जंगी अड्डा र झम्सिखेलको शशी भवन छाड्नु भएको छ ।

हिजो जंगी अड्डामा उहाँको भव्य बिदाई भएको थियो । बिदाईअघि नै उहाँको परिवार सरकारी निवास शशी भवनबाट आफ्नै निवास बूढानीलकण्ठ सरेको छ भने हिजै प्रभूराम शर्माले राष्ट्रपतिसङ्ग भेट गर्नुभएको छ ।

पदीय रुपमा थापा आगामी बिहीबारसम्म मुलुकको प्रधानसेनापति हुनुुहुन्छ । प्रभुराम शर्मालाई अहिले उहाँ बिदामा बस्नुभएकाले कायममुकायम दिइएको हो । २४ गते महिलाहरुको पर्व हरितालिका तीज परेकाले हिजो नै औपचारिक बिदाई गरिएको सैन्य स्रोतले बताएको छ ।

शर्मालाई राष्ट्रपति विद्यादेवी भण्डारीले बिहीबार साँझ शीतल निवासमा आयोजना हुने विशेष समारोहमा प्रधान सेनापतिको दर्ज्यानी चिन्ह प्रदान गर्ने कार्यक्रम छ ।

हिजोको कार्यक्रमलाई सेनाले यसअघिको भन्दा फरक ढंगले आयोजना गरेको छ । सेनापतिले पनि अघिल्ला बिदाई कार्यक्रममा भन्दा फरक ढंगले मार्मिक भावना राखेको बताइएको छ ।

थापाले आफ्नो कार्यकालमा जति काम गरियो ती सबैमा सकल दर्जाको सामूहिक योगदान रहेको उल्लेख गर्दै,‘कमिकमजोरीको जिम्मा आफूले लिने’ बताएर उपस्थित सबैको मन जितेको सहभागीहरुले बताएका छन् ।

‘आफ्नो कार्यकालमा भएका राम्रा कामको लागि मेरो टिम,मेरा स्टाफ, सकल दर्जालाई क्रेडिट जान्छ,’ उहाँले बताउनुभएको छ । पहिले सेनाले प्रधानसेनापतिको बिदाईमा एक खाले गाडाको प्रयोग गर्थ्यो ।

भलै त्यो गाडालाई सजाइएको हुन्थ्यो र केही सैनिकले भित्रबाट डोरीले तानेर बाहिर उनले चढ्ने मोटरसम्म ल्याउँथे । अहिले यसखाले अनमेल प्रचलन हटाइसकिएको छ ।