आज काँग्रेसको कतै धर्ना,कतै पत्रकार सम्मेलन

नेपाली काँग्रेसको १४ औं महाधिवेशनअगावै बाँडिएको क्रियाशील सदस्यतामा अनियमितता भएको आरोप लगाउँदै आएको रौतहट काँग्रेसले आज पनि पार्टी कार्यालयमा धर्ना जारी राखेको छ । बिहान ९ बजेदेखि शुरु भएको उक्त कार्यक्रम साँझ ५ बजेसम्म हुनेछ ।

आगामी महाधिवेशनमा पार्टी सभापतिको उम्मेदवारीको घोषणा गरेका केन्द्रीय सदस्य कल्याणकुमार गुरुङले आज दिउँसो पत्रकार सम्मेलन गर्ने भएका छन् । उनले १४ औं महाधिवेशनको सन्दर्भमा पत्रकार भेटघाट गर्न लागेको भन्दै दिउँसो साढे २ बजे युनियन हाउस, अनामनगरमा कार्यक्रम राखेको बताइएको छ ।

यता अनेरास्ववियु (क्रान्तिकारी) कोटेश्वर बहुमुखी क्याम्पस, कमिटीले दशौं क्याम्पस सम्मेलन गरिरहेको छ । कोटेश्वर बहुमुखी क्याम्पस, जडिबुटीमा उक्त कार्यक्रम भएको हो ।

नेपाली काँग्रेस नागार्जुन नगरपालिका ९ नं. वडा कार्य समितिले महाधिवेशन तयारीको लागि छलफल गरेको छ । परिकार पार्टी प्यालेस (सालिक चोक नजिक) मा बिहान ८ बजेदेखि छलफल भएको बताइएको छ ।

उता नेपाल वायुसेवा निगमका तीन वटा कर्मचारी युनियनले गर्दै आएको धर्ना कार्यक्रम आज पनि जारी छ । निगमको केन्द्रीय कार्यालय प्राङ्गणमा बिहान साढे १० बजेदेखि साढे १२ बजेसम्म धर्ना र नाराबाजी हुने जानकारी दिइएको छ ।

आज संसदको दिगो विकास तथा सुशासन समिति र विधायन व्यवस्थापन समितिको बैठक डाकिएको छ । दिगो विकासको ११ बजे र विधायन व्यवस्थापनको साढे ११ बजे संघीय संसद सचिवालय, सिंहदरबारमा बैठक डाकिएको हो ।

नेपाल ल क्याम्पसको डिनको कार्यालयमा विभिन्न विद्यार्थी संगठनले र समाजवादी प्राध्यापक संघले त्रिभुवन विश्वविद्यालय उपकुलपति,रेक्टर र रजिस्ट्रारको कार्यालयमा गरेको तालाबन्दीलाई आज पनि जारी राखेका छन् ।