माधव नेपालहरु छिर्दै गर्दा निर्वाचन आयुक्तहरु निस्किए,तीन दिन बिदाले नाम दर्तामा बाधा « Jana Aastha News Online
Logo
२ भाद्र २०७९, बिहीबार
|  Thu Aug 18 2022
Logo
२ भाद्र २०७९, बिहीबार
|  Thu Aug 18 2022

माधव नेपालहरु छिर्दै गर्दा निर्वाचन आयुक्तहरु निस्किए,तीन दिन बिदाले नाम दर्तामा बाधा

प्रकाशित मिति :  ३ भाद्र २०७८, बिहीबार १२:३०


हिजो नयाँ दल दर्ताको लागि एमाले वरिष्ठ नेता माधवकुमार नेपालको समूह निर्वाचन आयोगमा छिर्ने खबर आएसङ्गै निर्वाचन आयुक्तहरु साढे चार नबज्दै झोला र पत्रिका बोकेर घरतिर लागेका थिए । अध्यादेश जारी हुने र राजपत्रमा निस्कने समय निर्क्यौल नहुँदा प्रमुख निर्वाचन आयुक्त दिनेश थपलिया पनि एउटा पूर्व निर्धारित कार्यक्रममा सामेल हुन आफ्नो सचिवालयका कर्मचारीलाई जानकारी गराएर पौने ४ बजेतिर कान्तिपथबाट बाहिरिएका थिए ।

जसपाबा अलग्गिन महन्थ-राजेन्द्र र एमालेबाट छुट्टिएर नेकपा एमाले (समाजवादी) दल दर्ताको लागि नेपाल समूह बहादुर भवन पुग्दा त्यहाँ सचिव सुरेश अधिकारी मात्रै आयोगका ठूला अधिकारीको रुपमा भुइँ तल्लामा थिए । टोलीले उनैसँग दल दर्ताको सबै प्रशासनिक प्रक्रियाबारे छलफल गरेर निवेदन दर्ता गरेपछि साँझ साढे ५ बजेतिर बाहिरिएको हो । नेता नेपालको टोली पौने ५ बजे आयोग पुगेको थियो ।

नेपालले झैँ त्यसअघि आयोग पुगेको जनता समाजवादी पार्टी नेपाल (लोकतान्त्रिक) का नेता महन्थ ठाकुर समूहले पनि दर्ता प्रक्रियामा अनावश्यक विलम्ब नगरिदिन मात्र आग्रह गरेको थियो । अरु केही आग्रह र अनुरोध नगरेको आयोग स्रोतले बताएको छ । त्यसैले आयोगले आज नियमावली संशोधनको प्रक्रिया थाल्न लागेको छ ।

“पर्सि शनिबारसँगै आइतबार जनै पूर्णिमा र सोमबार गाईजात्रा परेकाले राजधानी उपत्यकामा तीन दिन सार्वजनिक बिदा दिइएको छ ।”

त्यसपछि नियमावलीलाई पनि राजपत्रमा प्रकाशित गरिनेछ । अनि मात्र दल दर्ताको लागि परेका निवेदनमाथि सनाखतको काम हुने एक जना सहसचिवले जानकारी दिएका छन् । उनका अनुसार चाहेर पनि छिटो गर्न नसकिने अवस्था छ । छिटो गर्नको लागि यसबीचमा पर्ने तीन दिनको सार्वजनिक बिदाले अप्ठेरो पार्ने पक्का छ । पर्सि शनिबारसँगै आइतबार जनै पूर्णिमा र सोमबार गाईजात्रा परेकाले राजधानी उपत्यकामा तीन दिन सार्वजनिक बिदा दिइएको छ ।

त्यसैले नयाँ दल दर्ताको लागि परेका दुई वटै निवेदनमाथिको औपचारिक कार्य अर्को साताको अन्ततिर मात्र सकिने सम्भावना बढेको हो । त्यतिञ्जेलसम्म माधव नेपालतिर लागेका एमाले नेता तथा कार्यकर्तालाई संस्थापन पक्षले तान्ने क्रम फेरि शुरु हुने नेपालनिकट एक जना नेताले जनआस्थालाई बताए ।

उहाँका अनुसार ४ वर्षदेखि अष्टलक्ष्मी शाक्यलाई मुख्यमन्त्री बनाउन अनिच्छुक अध्यक्ष ओलीले हिजो एकाध घण्टाभित्र मुख्यमन्त्री डोरमणिको राजीनामा, संसदीय दलको नेता छनोट, शाक्यलाई मुख्यमन्त्रीमा नियुक्ति र राति सपथ ग्रहणसमेत गराउन लगाउनुभएको थियो । ‘अप्ठेरो परेपछि उहाँले के सम्म गर्नुहुन्छ भन्ने यो नै गतिलो उदाहरण हो,’ उहाँले बताउनुभयो ।

प्रस्तावित नेकपा एमाले (समाजवादी) र जनता समाजवादी पार्टी (लोकतान्त्रिक) को नाम गत फागुन २३ गतेको सर्वोच्च अदालतको फैसलासँग बाझिनसक्ने सम्बन्धमा पनि आयोगले आज गहन छलफल गर्दैछ । ऋषि कट्टेलको नाममा दर्ता रहेको नेपाल कम्युनिष्ट पार्टीको आधिकारिकतासँग सम्बन्धित मुद्दामा सर्वोच्चले गरेको फैसलामा अर्को पार्टीसँग मिल्दोजुल्दो नाम कोष्ठभित्र राख्न नपाइने भनिएको छ ।


प्रतिक्रिया दिनुहोस !