एमालेमा अब दुबै पक्ष एक्ला चलो रे

कार्यदल (विघटित) स्तरमा एकता वार्ता चलिरहेका बेला संस्थापन पक्षले संगठनसम्बन्धी महत्वपूर्ण निर्णय गरेपछि एमाले विवाद बेग्लै मोडमा पुगेको छ । वरिष्ठ नेता माधव नेपाल पक्षले एकलौटी निर्णय नगर्न दिएको चेतावनीका बाबजुद संस्थापनले विधान संशोधन प्रस्ताव पार्टी गर्नुका साथै अन्य महत्वपूर्ण निर्णय गरेपछि एमाले विवाद उत्कर्षमा पुगेको हो ।

नेपाल समूहको उपस्थिति बिना नै आज बसेको संस्थापन पक्षको बैठकले विधान संशोधन प्रस्तावको मस्यौदा पारित गरेको छ भने पार्टी संरचना फेर्ने प्रस्ताव गरिएको छ । विधान संशोधन प्रस्तावमा केन्द्रीय समितिको संख्या २२५ जना हुने प्रस्ताव गरिएको छ । यस्तै अध्यक्ष र महासचिवबाहेक अन्य पदाधिकारी महाधिवेशनबाट निर्वाचित केन्द्रीय सदस्यले चुन्ने नयाँ व्यवस्था गरिएको छ ।

“प्रस्तावित विधानमा पोलिटब्यूरो नरहने र जिल्ला कमिटी खारेज गर्ने उल्लेख छ ।”

प्रस्तावित विधानमा पोलिटब्यूरो नरहने र जिल्ला कमिटी खारेज गर्ने उल्लेख छ । त्यस्तै,प्रदेश कमिटी र स्थानीय तह कमिटीलाई कार्यकारी बनाउने विधानमा प्रस्ताव गरिएको छ । स्थायी कमिटीबाट पारित भएर केन्द्रीय कमिटीमा छलफलमा रहेको विधान संशोधनको प्रस्ताव अनुमोदन भएपछि लागू हुनेछ ।

नेपाल समूहले भने एकता प्रक्रिया जारी रहेकाले बैठक रोक्न माग गर्दै आएको थियो । शुक्रबार सम्पन्न सो समूहको केन्द्रीय समिति बैठकले विधान अधिवेशन, सदस्यता नवीकरणलगायतका निर्णय नगर्न आग्रह गरेको थियो ।

संस्थापन पक्षले एकलौटी निर्णय गरेपछि नेपाल समूहले पार्टी एकता कठिन मोडमा पुगेको निष्कर्ष निकालेको छ । आजको निर्णयले केपी ओली एक्लै हिंड्न खोजेको पुष्टि भएको भन्दै नेता जीवनराम श्रेष्ठले पार्टी एकताको प्रयास असफल हुने अवस्थामा पुगेको बताए । आफ्नो समूहले यसबारे छिट्टै आधिकारिक धारणा बनाउने श्रेष्ठको भनाइ छ।

‘हामीले बैठक रोकेर सहमतिमा आउन औपचारिक निर्णय नै गरेका थियौँ । तर,उहाँहरुले बैठक रोक्नु भएन । एकपक्षीय रुपमा निर्णय गर्नुभयो भन्ने सुनिएको छ । मैले निर्णय त हेरेको छैन । विवाद बढिरहेका बेला गरिएका यस्ता निर्णयले एकता प्रक्रियालाई बिथोल्छ’

‘हामीले बैठक रोकेर सहमतिमा आउन औपचारिक निर्णय नै गरेका थियौँ । तर,उहाँहरुले बैठक रोक्नु भएन । एकपक्षीय रुपमा निर्णय गर्नुभयो भन्ने सुनिएको छ । मैले निर्णय त हेरेको छैन । विवाद बढिरहेका बेला गरिएका यस्ता निर्णयले एकता प्रक्रियालाई बिथोल्छ’,नेता श्रेष्ठले भन्नुभयो ।

नेपाल पक्षका अर्का एक नेताले पनि अध्यक्ष ओलीका कारण पार्टी एकता बिथोलिएको बताए । एकता प्रक्रियालाई कमजोर बनाउने गरी ओली एकलौटी रुपमा अघि बढेकाले आफूहरु चुपचाप नबस्ने उनको भनाइ छ । भने, ‘उहाँहरु एकलौटी रुपमा वडासम्मै संगठन विस्तारमा लागिसक्नुभ्यो । अब हामी चुप लागेर बस्दैनौँ,हाम्रा गतिविधि पनि अघि बढ्छ ।’

अध्यक्ष ओलीले भने संगठन विस्तारलाई थप ब्यापक बनाउन निर्देशन दिनुभएको छ । आजको केन्द्रीय कमिटी बैठकलाई सम्बोधन गर्दै उहाँले तल्ला कमिटीका गतिविधिहरु नरोक्न निर्देशन दिनुभएको हो । पार्टी जेठ २ अघिकै अवस्थामा पुगेको भन्दै उहाँले नेपाल पक्षलाई कुरेर बस्न नसकिने पनि प्रष्ट पार्नुभएको छ ।

नेपाल समूहका केही नेताले भने संस्थापन पक्षले बैठक स्थगित नगरे एमाले औपचारिक रुपमा विभाजन हुने यसअघि नै चेतावनी दिएका थिए । यद्यपि नेपाल समूहको औपचारिक धारणा आइसकेको छैन ।