देउवा असफल हुनेमा एमालेको चिन्ता,संयन्त्रको बन्धक नबन्न आग्रह « Jana Aastha News Online
Logo
९ आश्विन २०७९, आईतवार
|  Sun Sep 25 2022
Logo
९ आश्विन २०७९, आईतवार
|  Sun Sep 25 2022

देउवा असफल हुनेमा एमालेको चिन्ता,संयन्त्रको बन्धक नबन्न आग्रह

प्रकाशित मिति :  २४ श्रावण २०७८, आईतवार १८:३०


प्रमुख प्रतिपक्ष दल नेकपा (एमाले) की सांसद डा. विमला राई पौडेलले आफू कमजोर हुने गरी राजनीतिक संयन्त्र गठनमा सहमत नहुन प्रधानमन्त्री शेरबहादुर देउवालाई आग्रह गरेकी छन् । सत्ता साझेदार दलहरुबीच उच्चस्तरीय राजनीतिक संयन्त्र गठनको छलफल चलिरहेका बेला उनले प्रधानमन्त्री देउवालाई संयन्त्रको बन्धक नबन्न सुझाएकी हुन् ।

आज राष्ट्रियसभा बैठकको विशेष समयमा बोल्दै सांसद पौडेलले केपी ओली नेतृत्वको सरकारलाई अप्ठयारोमा पार्न त्यतिबेला पनि राजनीतिक संयन्त्रको माग गरिएको दावी गरिन् । अहिले पनि सरकारलाई कमजोर बनाउन सो प्रयास गरिएको उनको भनाइ छ ।

सांसद राईले राजनीतिक संयन्त्र बनाउने हल्लाकै कारण प्रधानमन्त्री देउवाले मन्त्रिपरिषद बिस्तार गर्न नसक्ने लज्जाजनक अवस्था आएको पनि बताइन् । संविधानले नचिन्ने राजनीतिक संयन्त्रको अर्थ नहुने भन्दै उनले प्रधानमन्त्री देउवालाई संसदप्रति जवाफदेही बन्न तर राजनीतिक संयन्त्रको बन्धक नबन्न पटक-पटक आग्रह गरिन् ।

प्रधानमन्त्री शेरबहादुर देउवाले आफ्नो पार्टी फुटाएर मात्रै मन्त्रिपरिषद् विस्तार गर्न चाहेको उनले गम्भिर आरोपसमेत लगाएकी छन् । संसद्को सबैभन्दा ठूलो पार्टी कहिले फुट्ला र मन्त्रिपरिषदमा समावेश गरौंला भनेर प्रधानमन्त्री देउवाले पर्खेर बसेको उनको भनाइ छ ।

‘सबैभन्दा ठूलो पार्टी कहिले फुट्ला र फुटेपछि मेरो सरकार टिकाउन मन्त्रिपरिषदमा ज्वाईन गरौंला भनेर पर्खी बस्ने प्रधानमन्त्री हो ? यति कमजोर प्रधानमन्त्री । चिन्ता शेरबहादुरजी कमजोर हुनु भो भनेर होइन,चिन्ता फेरि संसदीय व्यवस्था कमजोर हुन्छ भन्ने हो । यो व्यवस्थालाई कमजोर बनाउने काम नगर्न प्रधानमन्त्रीलाई मेरो अनुरोध छ’, उनले भनिन् ।


प्रतिक्रिया दिनुहोस !