साँचो मनले गरे नहुने केछ यहाँ « Jana Aastha News Online
Logo
२१ आश्विन २०७९, शुक्रबार
|  Fri Oct 7 2022
Logo
२१ आश्विन २०७९, शुक्रबार
|  Fri Oct 7 2022

साँचो मनले गरे नहुने केछ यहाँ

प्रकाशित मिति :  १२ फाल्गुन २०७३, बिहीबार ०९:२२


चार वर्षअगाडि लीलामणि पौडेल नेपाल सरकारको मुख्यसचिव भएका बेला एउटा कामको थालनी गरे, ‘बाग्मती सफाइ ।’ उनले शुरु गरेको त्यो रचनात्मक कामले यही शनिबार २००औं सप्ताह मनाउँदै छ र यसबीच, बाग्मतीको पानी धेरै सङ्लिएको छ । अभियान शुरु गरेको दोस्रो वर्षमै गौरीघाटमा विशिष्ट व्यक्तिले बाग्मतीको पानीमा नुहाउन मिल्नेसम्मको अवस्था बनेको थियो ।

सायद कसैले सोचेको थिएन कि बाग्मती यसरी सफा हुन्छ र अहिले धेरैले यही भन्छन्, नेपालको राजनीति सफा हुने सम्भावना छैन । तर, यहाँ भन्न खोजिएको के हो भने यदि एउटा मात्र मान्छे दृढसंकल्पसाथ लाग्यो भने नहुने केही छैन । चाहे त्यो ढल बग्ने बाग्मती होस् या फोहोरी खेलको दलदलमा फसेको राजनीति, कुनै एउटा मात्र मान्छेले सफा मन राखेर निःस्वार्थ काम गर्न थाल्यो भने सफा हुन्छ । र, त्यो सम्भव छ । गरे हुन्छ तर मन सफा चाहिन्छ भन्ने कुराको उदाहरण हामीसँग कुलमान घिसिङ पनि छन् । उनले जुन योजना, दृढता र चुनौतीबीच काठमाडौं उपत्यका र पूर्वाञ्चललाई लोडसेडिङमुक्त पारे त्यसको कसैले अपेक्षासमेत गरेका थिएनन् । तर, अहिले एउटा व्यक्तिको त्यो योगदानबाट करिब १ करोड नेपाली लाभान्वित भइरहेका छन् ।

समुच्च नेपालीले अब लोडसेडिङमुक्त नेपाल धेरै टाढा छैन भनेर विश्वास गरेका छन् । एउटा केपी ओलीले जे गर्छौ गर तर नेपालको स्वाभिमानमा सम्झौता गर्दिनँ भन्दा दक्षिणको ठुल्दाजु ६ महिनामा लुसुक्क आफैं पछि हट्न बाध्य भयो । सारा मुलुकले अकल्पनीय दुःख, कष्ट र अभाव झेल्यो । सक्ने, नसक्ने सम्झौता ग¥यो । तर, नेपाली झण्डा झुक्नुहुँदैन भन्ने राष्ट्र प्रमुखको अठोटलाई साथ दिइरह्यो । स्पष्ट थियो, प्रधानमन्त्रीका रूपमा केपी ओलीले जनताको साथ मागे र पाए । नेपाल सधँँै हेपिएर बस्दैन भन्ने आम नेपालीको साझा बोली बोले । बरु प्रधानमन्त्रीको कुर्सी हाँसी–हाँसी छाडे तर शिर झुकाएनन् । अनुहारमा तनाव झल्कन दिएनन् ।

औपचारिक तवरबाट कति काम होला, नहोला सरकारी सेवामा बसेका, राजनीतिको गुलियो चाखिसकेकाहरूले यस्ता कामको थालनी गर्लान्, नगर्लान् तर अब अनौपचारिक क्षेत्रबाट पनि स–साना नै सही सुधारात्मक कामको थालनी गर्नु जरुरी छ । कुनै एउटा अमुक व्यक्तिले पनि थाले हुन्छ त्यसमा साथ दिन हजारौं हात उपस्थित अवश्य हुनेछ । आउनुहोस्, अब राजनीतिलाई गाली गर्न छाडेर सामाजिक सुधारमा लागौं, आफ्नो गाउँ, टोल, समाज र परिवेशलाई सबैखाले प्रदूषणबाट मुक्त पार्ने अभियानको थालनी गरौं । त्यसपछि कुनै पनि दूषित पद्धति, संस्कार, राजनीति र व्यवहार आफैं हटेर जानेछ । टोल–टोलमा नयाँ अभियान थालनी गर्ने धेरै लीलामणि र कुलमानहरू देखा पर्नेछन् ।
 


प्रतिक्रिया दिनुहोस !