ओली अघि बढेको बढ्यै,भीम रावलहरु रोक्न खोजेको खोज्यै

पार्टी एकताका लागि माधव नेपाल पक्षलाई अब नपर्खिने निष्कर्षमा पुगेको एमाले संस्थापन खेमा बैठक बसेर भटाभट निर्णय गर्न थालेको छ । दुबैतिरका दोस्रो तहका नेताहरु एकताको प्रयासमै रहेकै बेला आफूपक्षीय स्थायी कमिटी बैठक बोलाएर अध्यक्ष केपी ओलीले संगठनसम्बन्धी महत्वपूर्ण निर्णयहरु गर्नुभएको हो ।

विघटित कार्यदलमा रहेका नेपालपक्षका नेताहरुले स्थायी कमिटी बैठक रोक्न आग्रह गरेपनि एकताको नाममा पार्टी लामो समय अनिर्णयको बन्दी बन्न नसक्ने भन्दै ओली कस्सिनुभएको छ । दुई दिनसम चलेको बैठकले एमालेको आन्तरिक जीवनमा दीर्घकालीन महत्व राख्ने निर्णयहरु गरेको छ । बिभिन्न विभागहरु गठन गर्नुका साथै विधान अधिवेशन,सदस्यता नवीकरणलगायतका निर्णय गरेर ओलीले नेपाल समूहलाई छोडेरै अगाडि बढ्ने प्रष्ट सन्देश दिइसक्नु भएको छ ।

ओलीले आफ्नो लाइन क्लियर गरिसक्दा पनि नेपाल पक्षका कतिपय नेता भने अलमलमा छन् । हुन त नेपाल समूहले पनि आफ्नो सांगठानिक गतिविधिलाई निरन्तरता दिइरहेको छ । चैत ४ र ५ गते राष्ट्रिय भेला गरी देशव्यापी समानान्तर कमिटी गठन गरेको छ । युवा-विद्यार्थी संगठनलाई चलायमान बनाइरहेको छ । अस्ति शक्ति प्रदर्शनसहित अखिल फोर्स घोषणा गरेको नेपाल समूह वडासम्मै पुगेर संगठन बिस्तारको अभियानमा जुटिरहेको छ ।

‘उनीहरु (ओली पक्ष) बिधान सम्मेलन भनेर तल-तल वडासम्म गैसके,हाम्रो चैं विद्यार्थीको कार्यक्रम पनि रोक्न खोज्छन्’,

तर,एकताका लागि हत्तारिएको नेपाल समूहकै केही नेता भने समानान्तर सांगठानिक गतिविधि रोक्नुपर्ने अडानमा पुगेको बताइन्छ । ती नेताले समानान्तर गतिविधि रोक्न वरिष्ठ नेता माधव नेपाललाई दबाब दिइरहेको सो समूहनिकट एक नेताले बताए । ‘उनीहरु (ओली पक्ष) बिधान सम्मेलन भनेर तल-तल वडासम्म गैसके,हाम्रो चैं विद्यार्थीको कार्यक्रम पनि रोक्न खोज्छन्’, उनले भने ।

बताइएअनुसार नेपाल समूहको तर्फबाट वार्ता टोलीमा रहेका नेताहरुले अखिल फोर्स र पिपुल्स भोलेन्टियर घोषणा नगर्न दबाब दिएका थिए । त्यसैले दुवै संगठनको घोषणा कार्यक्रममा पनि उनीहरु उपस्थित भएनन् ।

‘यता दबाब दिनेले युथफोर्स गठन किन रोक्न नसकेको ? उनीहरुले युथफोर्स बनाएपछि हामीले अखिल फोर्स गठन गरेको हो’,ती नेता अगाडि भन्छन्, ‘उनीहरु (ओली पक्ष) वडासम्म कार्यक्रम लिएर जाँदा एकता नभाँडिने अनि हामीले चैं केही कार्यक्रम गर्नेबित्तिक्कै एकता भाँडिने हुन्छ र ? ओली अघि बढिसके, हामीलाई रोकेर हुन्छ ?’