बैंकिङ्ग कसूर मुद्दाका फरार महिला प्रतिवादीहरु बेनीमा झ्याप्पै
अदालतबाट बैंकिङ्ग कसूर ठहर भएका फरार तीन जना महिला प्रतिवादी हिजो म्याग्दीमा पक्राउ परेका छन् । शहर तथा जिल्ला सदरमुकाममा आर्थिक अपचलनको काम गर्दै हिँड्ने र अदालतको ठहरपछि लुकिछिपी धन्दा चलाउँदै आएकाहरु पछिल्लो पटक म्याग्दीमा पक्राउ परेका हुन् ।
उनीहरुलाई जिल्ला अदालत म्याग्दीबाट बैंकिङ कसूर मुद्दामा कैद तथा जरिवाना ठहर भएपछि फरार प्रतिवादीलाई बेनीबजारका विभिन्न स्थानबाट हिजो प्रहरीले पक्राउ गरेको हो ।
पक्राउ पर्नेहरुमा बेनी नगरपालिका–२ बस्ने ५५ वर्षीया सुनिता नेपाली, नगरपालिका–४ बस्ने ३३ वर्षीया जगदेवी थापामगर र सोही ठाउँ बस्ने ३५ वर्षीया नीरकुमारी खत्री रहेका छन् । बैंकिङ्ग कसूर मुद्दामा सुनितालाई ६ महिना कैद तथा ९ लाख ७८ हजार २ सय २५ रुपैयाँ जरिवाना, जगदेवीलाई ६ महिना कैद तथा ९ लाख ७९ हजार ६ सय ४९ रुपैयाँ जरिवाना र नीरकुमारीलाई ६ महिना कैद र ९ लाख ७० हजार ३ सय ५६ रुपैयाँ जरिवाना ठहर भएको थियो ।
पक्राउपछि उनीहरुलाई फैसला कार्यान्वयनका लागि जिल्ला अदालत म्याग्दीमा उपस्थित गराइएको थियो । अदालतको आदेशपछि कैद तथा जरिवाना भुक्तानका लागि कारागार कार्यालय, म्याग्दी पठाइएको जिल्ला प्रहरी कार्यालय म्याग्दीले जनाएको छ ।
टिप्पणीहरू