निर्वाचन आयोग जाने रेशम चौधरीको इच्छा

डिल्लीबजार कारागारमा रहेका जसपाका सांसद रेशम चौधरीले पार्टीको आधिकारिकता विवादमा हस्ताक्षर सनाखत (हेड काउन्ट)का लागि निर्वाचन आयोग जाने इच्छा देखाएका छन् ।

तर, कागजी प्रक्रिया नमिलेका कारण उनलाई आयोग कार्यालय लैजाने कि जेलमै सनाखत गराउने निधो भैनसकेको कारागार स्रोतले बताएको छ ।

निर्वाचन आयोगले कारागारलाई यसअघि पठाएको पत्रअनुसार लैजान मिल्ने कि नमिल्ने भन्नेमा अन्योलता उत्पन्न भएको बताइएको छ ।

चौधरीलाई कारागारबाट बहादुर भवनस्थित आयोग कार्यालय लैजान आयोगको पत्र जरुरी पर्छ । कारागार स्रोतका अनुसार यसअघि आयोगले ‘सनाखतका लागि’ भन्ने व्यहोराको चिठी पठाएकाले जेलमै सनाखत गर्ने व्यवस्था मिलाइएको थियो ।

तर, सांसद चौधरीले आयोगमै जाने इच्छा जाहेर गरेकाले लैजाने सम्भावना समेत भएको बुझिएको छ । चौधरीले अध्यक्ष उपेन्द्र यादवको पक्षमा आफ्नो मत प्रकट गरिसकेको बुझिएको छ ।