टाउको गिन्ती रोक्न माग गर्दै महन्थ अदालतमा

पार्टीको आधिकारिकता विवादमा निर्वाचन आयोगको निर्णय रोक्न माग गर्दै जनता समाजवादी पार्टी (जसपा) का अध्यक्ष महन्थ ठाकुर अदालत पुगेका छन् । निर्वाचन आयोगमा सोमबार हुने सनाखत (हेड काउन्ट) रोक्न माग गर्दै ठाकुरपक्ष रिट लिएर सर्वोच्च अदालत गएको हो ।

जसपाको आधिकारिकता विवादमा सोमबार निर्वाचन आयोगले कार्यकारिणी समिति सदस्यलाई सनाखत गराउने निर्णय गरेको छ । कार्यकारिणी र संसदीय दल दुबैतिर अल्पमतमा परेपछि ठाकुर खेमा अदालतको शरणमा पुगेको हो ।

ठाकुरका तफर्बाट दायर रिटमा जसपा विवाद निरुपणका लागि साउन ११ गते बहुमत परीक्षण गर्ने निर्वाचन आयोगको निर्णय कार्यान्वयन नगर्न अन्तरिम आदेश माग गरिएको छ ।

सत्ता गठवन्धनलाई लिएर दुई धारमा विभाजित भएको जसपामा ठाकुर खेमा ओली नेतृत्वको सरकारमा सहभागी भएपछि विवाद चर्किएको थियो । अध्यक्ष उपेन्द्र यादव पक्षले सरकारमा सहभागी हुनेहरुलाई कारवाही गरेपछि विवाद थप उत्कर्षमा पुगेको थियो । दुवै पक्षले एकले अर्कालाई गरेको कारवाहीको जानकारी निर्वाचन आयोगलाई गराएका थिए ।

आयोगले दुवै पक्षको कारवाहीलाई मान्यता नदिएपछि यादव पक्षले आधिकारिकता दाबी गर्दै अर्को निवेदन दिएको थियो । आधिकारिकता सम्बन्धमा निर्णय लिन आयोगले सोमबार हेड काउन्ट गर्दैछ ।

यसअघि आयोगले सहमति कायम गर्न गरेको आग्रह दुवै पक्षले अस्वीकार गर्दै कानूनअनुसार हुने निर्णय स्वीकार गर्ने बताएका थिए । सोहीबमोजिम आयोगले इजलास गठन गरेर सुनुवाइ गरेको थियो । आयोगले हिजो विवाद उत्पन्न हुनुअघिको कार्यकारिणी समितिका सदस्यहरुलाई सनाखतका लागि सोमबार बोलाउने निर्णय गरेको थियो ।

विवाद उत्पन्न भएपछि एकलौटी हेरफेर गरेको कमिटीलाई निर्वाचन आयोगले मान्यता नदिएपछि ठाकुर समूह अदालत गएको बताइन्छ ।