२२ भाइलाई ओलीको २४ घण्टे स्पष्टिकरण,माधव नेपाललाई ढोका बन्द भएको घोषणा

नेकपा एमालेको संस्थापन पक्षले पार्टी निर्णय विपरित प्रधानमन्त्री शेरबहादुर देउवालाई विश्वासको मत दिने २२ जना सांसदलाई २४ घण्टे स्पष्टिकरण सोधेको छ । ललितपुरको च्यासलस्थित तुल्सीलाल स्मृति प्रतिष्ठानको भवनमा भर्खरै सम्पन्न संस्थापन पक्षमात्र सम्मिलित केन्द्रीय कमिटी बैठकले यस्तो निर्णय गरेको हो ।

बैठकले पार्टी अनुशासन उल्लंघन गरेको भन्दै २२ जनालाई २४ घण्टाभित्र स्पष्टीकरण पेश गर्न निर्देशन दिने निर्णय गरेको एक नेताले बताए । संविधानअनुसार ७६(५)को सरकारलाई विश्वासको मत दिएका आधारमा सांसदहरुलाई कारवाही गर्न नमिल्ने भएकाले उनीहरुलाई पार्टीको विधान आकर्षित हुने गरी साधारण सदस्यबाट हटाउने तयारी गरिएको बताइएको छ ।यसअघि बैठकलाई सम्बोधन गर्दै अध्यक्ष केपी ओलीले वरिष्ठ नेता माधव नेपाललाई कम्युनिष्ट आन्दोलनको गद्दारको संज्ञा दिनुभएको थियो । उहाँले नेता नेपाललाई एमालेमा ठाउँ नरहेको घोषणा नै गर्नुभयो । बैठकले कार्यदलले बुझाएको एकतासम्बन्धी १० बुँदे प्रस्तावलाई अनुमोदन पनि गरेको छ ।

हिजो प्रतिनिधिसभामा नेपाल पक्षका १४ सहित एमालेका २२ सांसदले प्रधानमन्त्री देउवालाई विश्वासको मत दिएका थिए । देउवालाई विश्वासको मत दिने ८ जना सांसद ओली समूहका हुन् ।