संस्थापन पक्षले ‘अन्तिम प्रयास’ भन्दै राखेको प्रस्ताव नेपालद्वारा अस्वीकार
दोस्रो पटक पुनर्स्थापित प्रतिनिधिसभाको बैठक बस्नुअघि एमाले संस्थापन पक्षले वरिष्ठ नेता माधवकुमार नेपालसमक्ष अन्तिम प्रयासको प्रस्ताव गरेको छ । सरकारलाई विश्वासको मत दिनेवारे नेपाल समूहसहितको उपस्थितिमा संयुक्त निर्णय गर्ने प्रस्ताव कार्यदलका सदस्यहरूमार्फत पठाइएको थियो । तर,संयुक्त भनेपनि बहुमतको आधारमा निर्णय गर्ने अध्यक्ष ओली पक्षको रणनीति बुझेपछि नेता नेपालले प्रस्ताव लिएर गएको टोलीलाई ‘नो’ भनेर फर्काइदिनुभएको थियो ।
त्यसपछि ओलीनिकट लुम्बिनी प्रदेशका मुख्यमन्त्री शंकर पोखरेलले सामाजिक सञ्जालमा ‘माधव नेपालले कार्यदलको प्रतिवेदनमा असहमति जनाएसँगै तीन महिनाको मेहनत खेर गयो’ भनेर लेख्नुुभएको हो ।
आजै नेपाल पक्षको विचार समूहको स्थायी समिति बैठक राख्न खोजे पनि केही सदस्यलाई सञ्चो नभएको भनेपछि नबोलाइएको बताइएको छ । यसबीच वरिष्ठ नेता झलनाथ खनालले नयाँ दिल्लीस्थित उपचाररत अस्पतालबाट देउवा सरकारलाई विश्वासको मत दिन आफू निकट माननीयहरूलाई वक्तव्य जारी गरेर अनुरोध गर्नुभयो ।
प्रधानमन्त्री देउवाले आजको प्रतिनिधिसभा बैठकबाट विश्वासको मत लिने खबर बाहिरिएपछि नेपाल निकट विघटित कार्यदलका सदस्यहरूले उहाँको निवासमै पुगेर असहमति जाहेर गर्नुभएको थियो । तर, प्रत्युत्तरमा उहाँले विश्वासको मत लिने अधिकार पूर्णतयाः प्रधानमन्त्रीको भएकाले आजको संसद बैठकमा उक्त प्रस्ताव निर्णयार्थ पेश गर्ने प्रधानमन्त्री देउवाको चाहना र निर्णयमाथि अरु कसैको पनि भूमिका नरहेको भन्नुभएको स्रोतले बताएको छ ।
टिप्पणीहरू