श्रीमानहरु संवैधानिक इजलासमा छिर्दै,सर्वोच्च वरपर सुरक्षाकर्मीको बाक्लो उपस्थिति

प्रतिनिधिसभा विघटनविरुध्दको मुद्दामा आज सर्वोच्च अदालतले निर्णय सुनाउने सम्भावनालाई मध्यनजर गर्दै अदालत बाहिर सुरक्षाकर्मीको उपस्थिति बढाइएको छ । उता संवैधानिक इजलासका न्यायाधीशहरु सबै अदालतमा आइसक्नुभएको छ । अदालत आए पनि उहाँहरु मध्यान्ह साढे १२ बजेसम्म आ-आफ्नै च्याम्बरमा हुनुहुन्छ ।

एक छिनपछि प्रधानन्यायाधीश चोलेन्द्र समशेर राणा र अन्य चार जना न्यायाधीश संवैधानिक इजलासमा प्रवेश गर्नुहुने स्रोतले दाबी गरेको छ । इजलासमा राणासहित न्यायाधीशहरु दीपककुमार कार्की,मीरा खड्का, आनन्दमोहन भट्टराई र ईश्वर खतिवडा हुनुहुन्छ ।यसबीच सुरक्षा सतर्कतालाई मध्यनजर गर्दै हाई अलर्टमा रहन गृह मन्त्रालयले मातहतका तीन वटै सुरक्षा निकायलाई निर्देशन दिएको बुझिएको छ । जसअनुसार काठमाडौंका रामशाहपथ,सर्वोच्च अदालत,सिंहदरबार,माइतीघर क्षेत्रमा अन्यत्र र अन्य दिनको तुलनामा सुरक्षाकर्मीको बाक्लो उपस्थिति देखिएको हो ।

सर्वोच्च वरपर र काठमाडौंका सडकमा आज पाँच सयभन्दा बढी सुरक्षाकर्मी परिचालन गरिएको काठमाण्डौका प्रहरी प्रमुख एसएसपी अशोक सिंहले बताउनुभयो । फैसलापछि उत्पन्न हुनसक्ने अवस्थालाई ध्यानमा राखेर नेपाल प्रहरी र सशस्त्र प्रहरीको बाक्लो उपस्थिति गराइएको हो ।