चाँदीको बालाको लोभमा भाइ मार्ने दिदी « Jana Aastha News Online
Logo
८ माघ २०७८, शनिबार
|  Sat Jan 22 2022
Logo
८ माघ २०७८, शनिबार
|  Sat Jan 22 2022

चाँदीको बालाको लोभमा भाइ मार्ने दिदी

प्रकाशित मिति :  २४ असार २०७८, बिहीबार २०:१५


हातमा लगाइएको चाँदीको बालाको निम्ति नातामा दिदी पर्ने दुई जना किशोरीले कैलालीमा साढे तीन वर्षका बालकको हत्या गरेका छन् । टिकापुर नगरपालिका १ मुनुवा रोडका दिलिप बिष्टका छोरा गोलु बिष्टको हत्या अभियोगमा स्थानीय दुई जना किशोरी पक्राउ परेका छन् ।

पक्राउ पर्नेहरूमा स्थानीय १५ वर्षीया किशोरी र टिकापुर नगरपालिका–१ डेरा गरी बस्ने लम्की चुहा नगरपालिका–६ घर भएकी १४ वर्षीया अर्की किशोरी रहेका छन् ।

दिदी नाता पर्ने ती किशोरीसँग जामुन खान गएको अवस्थामा सोमवार बिहानदेखि बेपत्ता भएका वालकको खोजी गर्ने क्रममा टिकापुर नगरपालिका–४ घोयली उपभोक्ता वनस्थित जमरा कुलोमा हिजो साँझ शव फेला परेको थियो ।

शव फेला परेपछि घटनाको थप अनुसन्धानका लागि सुदूरपश्चिम प्रदेश प्रहरी कार्यालय र जिल्ला प्रहरी कार्यालय कैलालीबाट ल्याइएका विशेष तालिमप्राप्त दुई वटा कुकुरको सहयोगमा प्रहरीले उनीहरूलाई पक्राउ गरेको हो ।

पारिवारिक रिसिइवीका कारण हत्या गरिएको हुनसक्ने प्रहरीले आशंका गरेको छ । योजनाबद्धरुपमा जामुन खाने भन्दै घरबाट झण्डै ५ सय मीटर टाढाको कुलोमा लगेर उनले लगाएको चाँदीको बाला थुतेपछि बालकलाई कुलोमा धकेलेर हत्या गरेको प्रहरीको प्रारम्भिक अनुसन्धानबाट खुल्न आएको छ ।


प्रतिक्रिया दिनुहोस !