हिरासतमा रहेकी ज्वाला संग्रौलाको फाइल सरकारी वकिलको कार्यालयमा
सामाजिक सञ्जालमा उग्र टिप्पणी गरेर लामो समयदेखि भाइरल बन्दै आएकी “समाज सुधारक” ज्वाला संग्रौला (टिका) तीन सातादेखि प्रहरी हिरासतमा छिन् ।
जेठ १४ गते आफ्नै साथी युवा संघमा आबध्द खुश्बु घिमिरेमाथि हातपात गरेको अभियोगमा प्रहरी हिरासतमा पुगेकी ज्वालाविरुद्ध तीन वटा मुद्दा एकैसाथ चलाइएको महानगरीय प्रहरी परिसरका प्रवक्ता रमेशकुमार बस्नेतले बताउनुभएको छ ।
कुटपिटमा संलग्न भएको मुद्दा अगाडि बढेलगत्तै कार्य क्षेत्रमा खटिएका ट्राफिक प्रहरी मणिनन्द झामाथि रंगभेदी र जातीय विभेदको अभिव्यक्ति दिएको भिडियो सामाजिक सञ्जालमा फैलिएको थियो ।
बस्नेतका अनुसार असार ६ गते पक्राउ परेकी संग्रौलाको तीन पटक म्याद थप भएको छ । अनुसन्धानका क्रममा जन्म दर्ता र विवाह दर्ताको सरकारी कागजात किर्ते गरेको समेत खुल्न आएको छ । त्यसैगरी घिमिरेमाथि कुटपिट र झाविरुद्ध रंगभेद र जातीय विभेदको शब्द प्रयोग गरेको आरोप पनि लागेको छ ।
तेस्रो पल्ट थपिएको म्याद हिजो सकिएपछि आज उनलाई अदालतमा पेश गरिएको बस्नेतले जानकारी दिनुभयो । उनीसँगै सरकारी कागजात किर्ते गरेको अभियोगमा उनका पति भनिने हिमाल उपाध्याय र अन्य एक जना महिलासमेत हिरासतमा छिन् ।
प्रहरीले सबैको फाइल जिल्ला सरकारी वकिलको कार्यालयमा पठाएर मुद्दाको प्रक्रिया अघि बढाएको पनि बस्नेतले जानकारी दिनुभयो ।
टिप्पणीहरू