राम्रो मौद्रिक नीति ल्याउन राष्ट्र बैंकलाई सुझाव « Jana Aastha News Online
Logo
१० माघ २०७८, सोमबार
|  Mon Jan 24 2022
Logo
१० माघ २०७८, सोमबार
|  Mon Jan 24 2022

राम्रो मौद्रिक नीति ल्याउन राष्ट्र बैंकलाई सुझाव

प्रकाशित मिति :  २२ असार २०७८, मंगलवार ११:३०


नेपाल उद्योग वाणिज्य महासंघले आगामी आर्थिक वर्षको मौद्रिक नीतिमा पुनर्कर्जालाई निरन्तरता दिन नेपाल राष्ट्र बैंकलाई सुझाव दिएको छ ।

महासंघका अध्यक्ष शेखर गोल्छाले हिजो आफूहरूले गभर्नर महाप्रसाद अधिकारीलाई भेटेर मौद्रिक नीतिमा पुनर्कर्जा,ऋण तालिका पुनर्संरचना र पुनर्तालिकालाई निरन्तरता दिन सुझाव दिएको बताउनुभएको हो ।

महासंघले ब्याजदरलाई दुई अंकमा नबढाउन पनि सुझाव दिएको छ । हालको विषम परिस्थितिका कारण ब्याजदरलाई एक अंकमा कायम गराउनसमेत आग्रह गरिएको छ ।

अर्थतन्त्रको मेरुदण्ड साना तथा मझौला व्यवसायीले धानेको उल्लेख गर्दै अध्यक्ष गोल्छाले साना तथा मझौला व्यवसायलाई कर्जाको प्रक्रिया सहज गराउन समेत माग गर्नुभएको छ । कूल कर्जाको १० प्रतिशत साना तथा मझौला उद्योगी व्यवसायीलाई दिने व्यवस्था मिलाउनसमेत उहाँले सुझाव दिनुभएको छ ।

महासंघले दुई वर्षसम्म कसैलाई पनि कालोसूचीमा नराखिदिन अनुरोध गरेको छ । साथै,राष्ट्र बैंकले बनाएको अति प्रभावित क्षेत्रको सूचीलाई परिमार्जित गरी अन्य पेशा,व्यवसायलाई समेत समेट्न उद्योगी तथा व्यवसायीहरूले माग गरेका छन् ।


प्रतिक्रिया दिनुहोस !