२६ करोडको सडक महिना दिनमै ध्वस्त,पत्रकार पुगे ठाउँमै

सिन्धुलीको दुधौली नगरपालिका १०,लखिमाबाट वडा नं. १३ को ठाकुर दमारसम्म गरिएको कालोपत्रे महिना दिन नपुग्दै क्षतविक्षत भएको छ । गत बुधबार रातिको मुसलधारे वर्षापछि बाँदरे खोलादेखि कामीटारसम्मको झण्डै ४ सय मीटर कालोपत्रे सबै डरलाग्दो तरिकाले उप्किएको हो ।

कालोपत्रे तोकिएको मापदण्डभन्दा कम मोटाइको गरिएको र त्यसअघिको सडक सतह राम्रोसँग नपेलिएको (कम्प्रेस्ड) हुँदा एक झर पानीले बगाएको विज्ञहरू बताउँछन् । ठेकेदारले ढुंगा र माटोमाथि थुपुथुपु अलकत्रा हालेको कारण माटोसहित पिच उप्किएको स्थानीयले बताए । उक्त सडकमा तीन सेन्टिमिटर बाक्लो कालोपत्रे हुनुपर्नेमा आधा मात्रै गरिएको बताइन्छ ।सडक निर्माणको जिम्मा सिन्धुलीको इमानुएल कम्पनीले लिएको हो । निर्माण कार्यको गुणस्तरमाथि प्रश्नचिन्ह उठिरहँदा कम्पनीका सञ्चालक छत्र बम्जनको प्रायोजनमा महामारीको बेला हिजो बिहान एक गाडी सिन्धुलीका सञ्चारकर्मी निरीक्षणको लागि गएका छन् ।

सामाजिक सञ्जालमा भत्किएको सडक र ठेकेदारको पिकनिक तस्बिर भाइरल भएको छ । पत्रकारहरूलाई बिहानै ठेकेदारले जबर्जस्ती आफ्नो सवारी साधनमा लोड गरेर लगेका थिए । ठेक्का सम्झौताअनुसार ठेकेदारले तीन वर्षसम्म उक्त बाटोको पुनर्निर्माण गर्नुपर्ने हो ।

नेपाल सरकार र एसियाली विकास बैंकको २५ करोड ८० लाख रुपैयाँ लगानीमा इ.सि.आई कन्काई जेभीको रोहबरमा सिन्धुलीकै इमानुएल निर्माण कम्पनीले सडक कालोपत्रे गरेको हो । सवा ६ मीटर चौंडाईको सडकमा साढे ४ मीटर कालोपत्रे गर्ने ठेक्का उक्त कम्पनीले पाएको थियो ।