भारतबाट हत्याराहरु भटाभट……

सरकारले ‘पारी’ लाई रिझाउन अनेक बहाना झिकिरहे पनि त्यताको राजनैतिक साथ घटेको छ, तर यही देशको प्रहरीले चाहिँ ‘पारी’ को भरपर्दो साथ पाउँदा अपराधीहरु ल्याउने–लैजाने क्रम चलिरहेको छ ।

गत कात्तिक १ गते धनगढीस्थित अस्थायी प्रहरी पोष्ट जुगेडाका असई गोविन्द बिक र जवान रामबहादुर साउद मारिएका थिए । घटना भएको १९ दिनभित्र प्रहरीले ९ जनालाई नियन्त्रणमा लियो । तीमध्ये आधा अभियुक्त भागेर भारत पुगेका थिए । अन्तिममा राजीव गुप्तालाई भारतीय प्रहरीको सहयोगमा नेपाल प्रहरीले नियन्त्रणमा लियो । तर, पत्रकार सम्मेलनमा भनियो, उनी सीमाक्षेत्रबाट समातिएका हुन् । त्यसरी भारतीय प्रहरीको सहयोगमा नेपाल प्रहरीले पर्कु भन्ने रोहित राना (क), रोहित राना (ख), राजेन्द्र राना, सुरेश राना, गब्बर भन्ने राजकुमार राना, रामनिवास राना, टल्लु भन्ने दलराम राना र गोपाल भन्ने रामगोपाल रानालाई भारतीय प्रहरीको सहयोगमा समातेको थियो ।

यस्तै भयो, सिराहामा अनेकन अभियोग लागेर भारतमा लुक्दै बसेका आरके यादवको हकमा पनि । उनी अहिले नयाँ दिल्ली प्रहरीद्वारा पक्राउ गरी विभिन्न मुद्दामा अनुसन्धानको दायरामा छन् ।

सिरहा, झिजोलका सोमनाथ यादवलाई आरके र उमेश यादवले बरियापट्टी गाउँबाट अपहरण गरी परिवारका सदस्यसँग एक करोड फिरौती मागेपछि उनको खोजीमा प्रहरी सक्रिय भएको थियो । सिराहा प्रहरीको लापरवाहीका कारण आरके त्यहाँबाट भाग्न सफल भए । तर, प्रदेश प्रहरी प्रमुख धीरजप्रताप सिंह आफैँ अभियुक्तको खोजीमा सक्रिय भएपछि उनी भारतमा फेला परेका हुन् । शुरुमा उनीे सुपौल जिल्लामा लुकेर बसेको र अपहरित सोमनाथलाई पनि त्यहीँ लुकाइएको सूचना प्रहरीले पायो । त्यसपछि नेपाल प्रहरीको टोलीले सुपौल प्रहरीका एसपी मनोजकुमारसँग सम्पर्क ग¥यो ।

शुरुमा सिराहा प्रहरीको टोलीले खोजेको सूचना पाएपछि आरके अपहरित व्यक्तिसहित त्यहाँबाट बेपत्ता भए । उनीविरुद्ध दिल्ली प्रहरीले रेडकर्नर नोटिश जारी गरेका कारण सुपौल प्रहरी पनि उनको खोजीमा जुट्यो । तर, अर्का अभियुक्त उमेश यादवलाई भने प्रहरीले नियन्त्रणमा लियो । उमेश पक्राउ परेपछि अपहरित सोमनाथलाई उमेशको निर्मलीस्थित महुआ गाउँमा लुकाइएको सूचना प्रहरीले पायो । अपहरणमा संलग्न मधुवनी जिल्लाका बासिन्दा सतिश यादव पक्राउ परे, तर आरके र अपहरित व्यक्ति फेला परेनन् । तर, सतिशबाट प्रहरीले थाहा पायो, सोमनाथको हत्या गरी उनलाई कोशी नदीमा फ्याँकिएको । प्रहरीले गोताखोरको सहयोगमा शव खोज्यो, तर भेटेन । यसबीच आरकेको सिरहा, गोठटोलस्थित ससुराली घरबाट मोबाइल बरामद भयो । यसपछि उनी सुपौल प्रहरीबाट नयाँदिल्ली चलान भएको सूचना नेपाल प्रहरीले पायो ।

आरकेविरुद्ध नेपालमा १५ वटा मुद्दा छन् । बम बिष्फोटका मुद्दा ३–४ वटा, अपहरणका ५–७ वटा । अहिले भारतीय प्रहरीले हत्या अभियोगमा कारवाही गरे पनि हत्या पुष्टि हुने भौतिक आधार नभेटिएका कारण उनी तारिखमा छुट्ने भएका छन् । त्यहाँबाट नेपाल चलान भएपछि अर्को मुद्दा तयारी छ । उनी पहिला जनतान्त्रिक मधेसी मोर्चामा लागेका थिए । सिराहा प्रहरीले सात–आठ वर्षअघि नै उनका अपराधहरु ठहर गरेको हो । तर, समात्न सकेन ।

त्यस्तै, सिराहा सदरमुकामस्थित डुम्बाखाता बस्ने प्रदीप यादवका दुई वर्षीय छोरा पियांशु पनि भारतीय प्रहरीको सहयोगमा फेला परेका थिए । प्रहरीले भारतको बिहार राज्यअन्तर्गत मधुवनी जिल्लाको खाजेडीबाट बालकको उद्धार गरेको हो ।