बिहे गरेको बिर्सेका पुरुषको श्रीमतीसँग फेरि बिहे

अल्जाइमर अर्थात् बिर्सने रोगका कारण आफू विवाहित रहेको हेक्का गुमाएका एक पुरुषले श्रीमतीसँग फेरि धुमधामसँग विवाह गरेका छन् । यो घटना अमेरिकास्थित कनेक्टिकट राज्यमा भएको हो । ५६ वर्षे पिटर मार्शल केही वर्षदेखि अल्जाइमरसँग संघर्ष गरिरहेका छन् । उनले आफू १२ वर्षदेखि विवाहित रहेको कुरा बिर्संदै आएका थिए ।

गत डिसेम्बरको एक शनिबार साँझ पिटर र श्रीमती लिसा मार्शल मनपर्ने टेलिभिजन कार्यक्रम हेरिरहेका थिए । त्यत्तिकैमा मायालु पाराले हेर्दै पिटरले आफूलाई बिबाहको प्रस्ताव राखेको पत्नी लिसाले सञ्चारमाध्यमहरुलाई जानकारी दिएकी छन् ।

पहिलो पटक पिटरले रोडेआइल्याण्डको यात्राको क्रममा लिसा आफ्नी पत्नी रहेको कुरो नै बिर्सिएका थिए । बेला बेला पिटरले लिसा आफ्नी पत्नी हुन् भन्ने कुरा बिर्सिंदै आफ्नो मनपर्ने व्यक्तिको रुपमा आफैँलाई बोलाउने गरेको लिसाले बताएकी छन् ।

उनीहरुको पेन्सिल्भेनियाको ह्यारिसवर्गमा छिमेकीको रूपमा भेट भएको थियो । ८ वर्षको प्रेम सम्बन्धपछि सन् २००९ मा विवाह गरेका थिए । तर, कडा अल्जाइमरका कारण उनले प्रेम सम्बन्ध त कता हो कता सँधै अंगालो हालेर मायाँ गर्ने श्रीमतीलाई समेत बिर्सेका हुन् ।