घरबेटी प्रधानको पक्षमा आज पनि हस्ताक्षर संकलन
जातीय विभेदको अभियोगअन्तर्गत बेफ्वाँक तीन दिन प्रहरी हिरासतमा थुनिएकी सरस्वती प्रधानलाई न्याय दिलाउन भन्दै आवाज उठ्न थालेको छ । सञ्चारकर्मी तथा गायिका रुपा सुनारलाई जातीय विभेद गर्दै कोठा भाडामा नदिएको भन्ने रुपाको उजुरीका आधारमा घरबेटी प्रधानलाई प्रहरीले तीन दिन हिरासतमा लिएको थियो । पछि सरकारी वकिलको कार्यालयले प्रमाण नपुगेको भनेपछि प्रहरीले बबरमहलकी प्रधानलाई हिरासतमुक्त गरेको हो ।
अहिले उनको समर्थनमा आवाज उठ्न थालेको छ । सोही क्रममा आज काठमाडौंको हनुमानढोका क्षेत्रमा निर्दोष प्रधानलाई न्याय दिलाउन गठन भएको संघर्ष समितिले हस्ताक्षर संकलन सम्पन्न गरेको छ । आज बिहान साढे १० बजेको समयमा समितिका संरक्षक यादवलाल कायस्थ र संयोजक श्रेणा प्रजापतिको नेतृत्वमा उक्त कार्यक्रम आयोजना गरिएको बताइएको छ ।
हस्ताक्षर संकलन कार्यक्रममा विभेदविरूद्ध हाम्रो पनि साथ छ, तर अरुको सम्पत्तिमा आफ्नो अधिकार खोज्नु सरासर गलत हो, निर्दोष महिला तीन दिन थुनिनु र उनलाई अपराधी ठान्नु गलत हो, सरस्वती प्रधानलाई न्याय दिलाउन एक जुट बनौँ भन्ने नारासमेत लगाइएको थियो ।
टिप्पणीहरू