थुनामा रहेकी ज्वाला (टीका) संग्रौलाको म्याद पाँच दिन थप

कुटपिट मुद्दामा आइतबार पक्राउ परेकी सामाजिक सुधारक भनिने ज्वाला संग्रौलाको प्रहरी हिरासतको म्याद पाँच दिन थपिएको छ । युवा संघमा आवध्द संग्रौलाकी पहिलेकै साथी खुश्बु ( नविता) घिमिरेलाई कुटपिट गरेको जाहेरीका आधारमा पक्राउ परेकी संग्रौलाको अनुसन्धान पूरा नभएकाले म्याद थपिएको महानगरीय प्रहरी परिसर काठमाडौंले जनाएको छ ।

संग्रौलाबिरुद्ध घिमिरेले दिएको जाहेरीलाई आधार मानेर अनुसन्धान गर्दा उनीहरुबीच वैमनश्यता रहेको केही प्रमाण भेटिएको बताइएको छ । यद्यपि, पछिल्लो झगडा र कुटपिटको सम्बन्धमा अनुसन्धान गर्न तीन दिनको समय कम भएपछि प्रहरीले जिल्ला प्रशासन कार्यालयबाट थप पाँच दिन समय माग गरी अनुसन्धान प्रक्रिया अघि बढाएको परिसरले जनाएको हो ।

संग्रौलासहित उनको समूहका केहीले जेठ १४ गते खुश्बुलाई कुटपिट गरेको किटानी जाहेरीमा उल्लेख छ । उता,जातीय विभेद गरेको आलोचनासमेत खेपिरहेकी संग्रौलाबिरुद्ध विभेदमा परेका भनिएका ट्राफिक प्रहरीका असई मणिनन्द झाले संग्रौलाबिरुद्ध उजुर हाल्ने मनशाय नबनाएको महानगरीय ट्राफिक महाशाखाका प्रवक्ता कृष्ण अधिकारीले बताउनुभएको छ । अधिकारीका अनुसार झा अहिले उजुर हालेर थप लफडा मोल्ने पक्षमा छैनन् ।