जर्मनी पठाउने नाममा करोडौं ठगी, डेढ सय जना ठगिएको अनुमान

काठमाण्डौँको बसुन्धारास्थित एभरेष्ट ग्लोबल रिक्रुटमेण्ट सर्भिसले नर्सिङसम्बन्धी विशेष तालिमका लागि युरोपेली मुलुक र अमेरिका पठाउने भन्दै धेरैजनालाई ठगेको रहस्य खुलेको छ । एभरेष्टले बेलायतमा प्रोफेशनल एक्लेरेटेड रूट (पीएआर), जर्मनीमा इम्प्लोइमेण्ट मोबिलिटी ब्रीज कोर्स र अमेरिकामा एनसीएलइएक्स तालिम कार्यक्रमको निम्ति पठाउने भन्दै ठगी गरेको बताइएको छ ।

एभरेष्टले विभिन्न व्यक्तिसँग एउटै कोर्सको निम्ति फरक दरमा रकम असुलेको पीडितहरूले बताएका छन् । उनीहरूका अनुसार भारतीय नागरिक राजेश मिस्काले बेलायत,जर्मनी र अमेरिका पठाउने भन्दै तीन वटा देशका लागि छुट्टाछुट्टै कोर्समा तालिम दिने बताएका थिए । तर रकम उठाएपछि अहिले उनी पनि बेपत्ता भएको बताइन्छ ।

इम्प्लोइमेण्ट मोबिलिटी ब्रीज कोर्स गर्न जर्मनी जानेहरूलाई पहिले रोमानियामा तालिम दिएर पछि जर्मनी लैजाने बताइएको उनीररूले जानकारी दिएका छन् । अहिले उक्त कम्पनीका नेपाली मालिक देउमान तामाङ र भारतीय साझेदार मिस्का गायब भएका छन् । दुई वर्ष बिते पनि उनीहरूले विभिन्न बहाना बनाउँदै आएका थिए । पछिल्लो डेढ वर्षदेखि कोरोनाका कारणले उड्न नमिलेको बताउँदै आएका तामाङ र मिस्का पछिल्ला दिनमा सम्पर्कविहीन भएका छन् ।

पीडितलाई नयाँ सम्पर्क नम्बर पनि नदिएकाले उनीहरूले कम्तिमा १ सय ५० जनालाई बिचल्ली बनाएको बुझिएको छ । केही समयअघि भारतीय नागरिक मिस्काले ह्वाट्ससएप मार्फत् पोल्याण्ड जाने भए आफूहरूले छिट्टै उडाउने बताएका थिए । तर अहिले उनै मिस्काको ह्वाट्सएप समेत ब्लक गरिएको छ ।

जर्मनी, बेलायत र अमेरिकामा नर्सिङका लागि विशेष तालिम गराउने भन्दै उनीहरूले ८ लाख, रेडियोलोजिस्टको निम्ति ४ लाख रुपैयाँसम्म तोकेका थिए । ठगिएका १ सय ५० जनामध्ये सबैसँग न्यूनतम २ लाख ४० हजार लिएको रहस्य पनि हालै खुलेको छ ।