निर्वाचन आयोगमा जसपाका ३० नेताको हस्ताक्षर

पार्टीको आधिकारिकता दाबी गर्दै जनता समाजवादी पार्टी (जसपा) को उपेन्द्र–बाबुराम पक्षले ३० जना कार्यकारिणी सदस्यको हस्ताक्षरसहित निर्वाचन आयोगमा निवेदन बुझाएको छ ।

अध्यक्ष उपेन्द्र यादव र संघीय परिषद् अध्यक्ष डा. बाबुराम भट्टराईसहित दुई दर्जन नेता बहादुर भवनस्थित आयोग पुगेर भर्खरै निवेदन दर्ता गराएका हुन् । यादव र भट्टराईसहित वरिष्ठ नेताद्वय अशोक राई र राजेन्द्र श्रेष्ठ, २ नम्बर प्रदेशका मुख्यमन्त्री लालबाबु राउतलगायतका नेताहरु आयोग कार्यालय पुगेका थिए ।

जसपामा लामो समयदेखि विवाद छ । विवादकैबीच महन्थ ठाकुर खेमा सरकारमा सहभागी भएपछि विवाद चर्किएको हो । पार्टीको निर्णय विपरित ठाकुरपक्ष सरकारमा सहभागी भएपछि जसपाको कार्यकारिणी समितिको बहुमतले ठाकुरसहित चार नेतालाई पार्टीबाट हटाएको थियो । ठाकुरपक्षले पनि यादवलाई कारबाही गरेको थियो । कारबाहीको जानकारी गराउँदै दुवै पक्षले आयोगमा विवरण अद्यावधिकका लागि निवेदन दिएका थिए ।

आयोगले दुबै पक्षको निर्णयलाई अवैध ठहर गरेपछि बहुमतको निर्णयलाई मान्यता नदिएकोमा रुष्ट बनेको उपेन्द्र–बाबुराम पक्ष आधिकारिकता दाबी गर्दै आज पुनः आयोग पुगेको हो ।

जसपाको ५१ सदस्यीय केन्द्रीय कार्यकारिणी समितिमा ३० जनाले उपेन्द्र–बाबुरामपक्षमा हस्ताक्षर गरेपछि ठाकुर खेमा अल्पमतमा परेको छ ।