निश्कासित चारै सभासद एमालेमा कायम

सर्वोच्च अदालतले पुनर्वहाली गर्न आदेश दिएका ४ सांसद एमालेमै फर्किएकाे सभामुख राजबहादुर शाहीले घाेषणा गरेका छन् । आज सभामुखले सर्वोच्चको आदेशमुताबिक ४ जना एमाले संसदीय दलको सदस्यका रुपमा फर्किएको पत्र प्रदेशसभामा पढेर सुनाएका हुन् ।

एमालेका प्रकाश ज्वाला, अम्मरबहादुर थापा,कुर्मराज शाही र नन्दसिंह बुढा सर्वोच्च अदालतको आदेशअनुसार नेकपा एमाले प्रदेश संसदीय दल सदस्यको हैसियतमा कायम रहने उनले घोषणा गरे ।

अब प्रदेशसभाका ४० जना सांसदमध्ये एमालेसँग सभामुखसहित २० जना भएका छन् । यसैगरी, माओवादीका १२, कांग्रेसका ६ र राप्रपाका १ सांसद छन् । राप्रपाले पनि सरकारलाई समर्थन गरेको छैन । तसर्थ जम्मा १८ सांसदसहित मुख्यमन्त्री शाही प्राविधिक हिसाबले अल्पमतमा देखिएका छन् । उनको समर्थनमा फ्लोर क्रस गरेबापत एमालेले यिनको पद खाइदिएको थियो ।