‘जिउँदो लाश’ बनेकी मोडल निशाको मेघाद्वारा उध्दार (भिडियो सहित) « janaaastha.com
५ असार २०७८, शनिबार

‘जिउँदो लाश’ बनेकी मोडल निशाको मेघाद्वारा उध्दार (भिडियो सहित)



दुर्घटनामा परेर तीन वर्षदेखि मृत्युशैयामा छट्पटाइरहेकी कलाकार तथा मोडल निशा घिमिरेको आज उध्दार गरिएको छ । नर्भिक अस्पतालकी प्रबन्ध निर्देशक मेघा चौधरीले घिमिरेको उध्दार गर्नुभएको हो ।

तीन वर्षअघि मोडल रहेकी निशा घिमिरेको अहिलेको अवस्था पत्याउनै नसक्ने ‘दर्दनाक’ देखिएको थियो । निशा आर्थिक अभावका कारण उपचार नपाउँदा घरमै अर्धचेत अवस्थामा थन्किएकी थिइन् ।

तीन वर्षअघि भारतको देहरादूनमा भएको सडक दुर्घटनामा उनी गम्भीर घाइते भएकी थिइन् । दुर्घटनापछि भारतकै अस्पतालमा उपचार गरिएको थियो । तर, उपचार खर्च निकै महङ्गो भएपछि कमजोर आर्थिक अवस्थाका अभिभावकले छोरीलाई नेपालमै ल्याउने निर्णय गरे ।
काठमाण्डौंको ट्रमा सेन्टरमा तीन महिनाको उपचार र त्यसपछि चिकित्सकहरुको सल्लाहमा उपत्यकाका विभिन्न थेरापी सेन्टरहरुमा नियमित थेरापी गरियो । थेरापीको निम्ति अर्थ अभावसँगै कोरोना संक्रमण बढेपछि घरमै राखिएको थियो ।


उनको दयनीय शारीरिक अवस्थाबारे नवजीवन परोपकार समाजका सञ्चालक दुर्गानाथ दाहालले सामाजिक सञ्जालमा लेखेपछि नर्भिककी प्रबन्ध निर्देशक चौधरीले चासो राख्दै उपचारको प्रबन्ध र उध्दारको व्यवस्था मिलाएको बताइन्छ ।

दाहालका अनुसार दुर्घटनाअघि खाइलाग्दी शरिरकी घिमिरे अहिले सुकेर २० किलोग्रामको भएकी छन् । अस्थिपञ्जर मात्र देखिन थालेपछि उनलाई आफन्तले समेत चिन्न मुश्किल पर्न थालेको दाहाल बताउँछन् ।

आज बिहान अस्पतालले आफ्नो एम्बुलेन्सबाट उनको उध्दार गरेको हो । प्रारम्भिक जाँचको क्रममा उनमा नशाको समस्या देखिएको छ । तर शरीरका महत्वपूर्ण अरु अङ्गमा ठूलो समस्या नरहेको चिकित्सकहरुले बताएका छन् ।

नर्भिकका चिकित्सकहरुले निशाको अवस्थामा सुधार हुने बताएको उल्लेख गर्दै दाहालले भनेका छन् ‘पहिलाजस्तै मोडलिङ नै गर्ने गरी त ठीक नहोला तर कम्तीमा आफैं हिँडडुल गर्नसक्ने, खानसक्ने र केही बोल्न सक्नेसम्म भयो भने पनि धेरै हुन्छ ।’

अहिले उनी बोल्न सक्दिनन् । अरुले नै खुवाइदिनुपर्छ । कसैले केही कुरा गरेमा सुन्न सक्छिन् तर बुझेर आँसु भने बगाउँछिन् । जवाफ दिन नसक्ने अवस्थामा छिन् ।

छोरीको उध्दार भएकोमा निशाका बुबाले भने ‘छोरी जिउँदो लाश भएर लडेको तीन वर्ष भयो । अब चाहिँ थोरै भए पनि उठ्छे कि भन्ने आशा पलाएर आएको छ ।’

नर्भिककी प्रबन्ध निर्देशक मेघाले घिमिरेको दर्दनाक अवस्था फोटोमा देखेपछि आफूले उद्धार गरेको बताउनुभएको छ । आफ्नै समन्वयमा सम्भव हुने सबै उपचार गरिने उहाँले जानकारी दिनुभयो ।

चौधरीले यसअघि पनि समस्यामा परेका दर्जनौं असहायको उध्दार गरी निःशुल्क उपचारको व्यवस्था गरिसकेको बताइन्छ ।

Tags :

प्रतिक्रिया दिनुहोस !

सम्बन्धित खबरहरु

“जीरो ईरोर (डिफेक्ट्) सिण्ड्रोम” बाट ग्रसित नेपाली सेना
अन्तरिक्षबाट यस्तो देखियो नेपाल र हिमालय क्षेत्र (फाेटाे फिचर)
दलाए दलाए, अन्तिममा ढलाए
अष्ट्रेलियाको भन्दै सुर्खेतको बाँड्दै
Add

Scroll Up