राउटे युवतीमाथि करणी गरेको स्वीकार

सुर्खेतमा दुई जना राउटे युवतीलाई होटलमा लगेर जबर्जस्ती गरी भिडियो खिचेका युवाहरुले प्रहरी बयानमा ‘आफूहरुले सबै काम गरेको’ भनेर स्वीकारेका छन् । राउटे समुदायले बाहिरी समाजसँगको उठबसलाई राम्रो ठान्दैन । ती युवतीसँग सुर्खेतका युवाहरुको लसपस थाहा पाए समुदायभित्रैबाट लास गायव हुने खतरा छ । यसर्थ अहिले कर्णाली प्रदेश सरकारले उक्त समुदायको विशेष निगरानीको लागि वस्ती वरिपरि २२ जना सशस्त्र र नेपाल प्रहरी परिचालनसङ्गै सुरक्षा गस्ती बढाइएको छ ।

गुर्भाकोट नगरपालिका ११, आँपसोतीस्थित भेरी नदी किनारमा बस्दै आएका लोपोन्मुख राउटे समुदायको सुरक्षा र अन्य व्यवस्थापनको लागि कर्णाली प्रदेश सरकारले सामाजिक विकास मन्त्रालयअन्तर्गत एउटा कमिटी गठन गरेको बताएको छ । मन्त्रालय स्रोतका अनुसार प्रारम्भिक अवस्थामा युवतीहरुको सुरक्षा व्यवस्था मिलाइएको छ । तत्काल राउटे समुदायसम्म वाह्य समुदायका मानिस पुग्न र उनीहरुलाई ‘डिस्टर्ब’ नगर्न आवश्यक प्रबन्ध मिलाइएको छ ।

निकै पिछडिएको उक्त समाजमा आफ्नो समुदायभन्दा बाहिरका परपुरुषसँग लागेको थाहा पाएमा युवतीहरुको जीवन नै जोखिममा पर्ने भएकाले प्रशासनले विशेष सतर्कता अपनाएको बताइन्छ ।

मुखियाहरुको आँखा छलेर अब युवतीहरुको स्वास्थ्य र शारिरिक परीक्षण गर्नुपर्ने अवस्था छ । राउटे समुदायलाई युुवतीहरुमाथि भएको दुर्व्यवहारबारे कुनै जानकारी नहुने तवरले आवश्यक प्रक्रिया अपनाएको छ । सहजीकरणको लागि मन्त्रालयको एउटा टोली अहिले उक्त क्षेत्रमा कार्यरत छ ।

शारिरिक शोषणमा परेका राउटे युवतीहरु समुदायभित्रै छन् । उक्त घटनाबारे समुदाय हालसम्म अनभिज्ञ रहेको बताइन्छ । उनीहरुको सबैभन्दा ठूलो मान्छे मुखिया हुन् । उनलाई समेत जानकारी नभएकाले त्यहाँभित्र केही पनि नयाँ गतिविधि नभएको बताइन्छ ।

राउटे समुदायभित्र हुने हत्या,हिंसाबारे प्रशासनले समेत कुनै अनुसन्धान गर्न नसक्ने भएकाले प्रशासन सचेत हुँदै सुरक्षाकर्मी परिचालन गरिएको बताइन्छ ।
।