शीतल निवासले ५० लाख भनिरहँदा नजिकैका अमेरिकी राजदूतले अंग्रेजीमा यसो भने..

राष्ट्रपति विद्यादेवी भण्डारीका प्रेस विज्ञ टीकाप्रसाद ढकाल धेरै बाठो हुँदा मुलुकको सम्मानित संस्था राष्ट्रपति र राष्ट्रपतिको कार्यालय विवादमा तानिएको छ । कोरोना महामारीमा विश्वका सबैजसो शक्तिशाली मुलुक खोप कूटनीतिलाई अघि बढाइरहेका छन् । नेपाललगायतका विपन्न र महामारीबाट आक्रान्त मुलुकहरू भने खोप राजनीति गर्न बाध्य छन् ।

महामारीको दोस्रो लहरले छिमेकी मुलुकलाई हावाकावा खेलाइरहँदा हाम्रो मुलुकमा जनता मात्रै होइन, सरकार स्वयम् सयौंको जमघटमा व्यस्त थियो । सरुवा रोग विज्ञहरूले स्वास्थ्य चेतावनी दिइरहँदा त्यसप्रति कसैले वास्ता गरेको देखिएन । बरु उल्टै राजनीतिको फोहोरी जोड घटाउमा बालुवाटार र शीतल निवास जुटेको आरोप लाग्यो ।दिनहुँ झण्डै १० हजारको हाराहारीमा संक्रमण र औसत दुई सयको निधन हुन थालेपछि सर्वत्र हाहाकार मच्चियो । शीतल निवासले बालुवाटारको फोहोरी राजनीतिमा साथ दिएको चर्चा चलेपछि फेस सेभिङकै लागि भए पनि असंवैधानिक पहल गरेको देखियो । अन्य देशको खोप कूटनीतिलाई सम्बोधन गर्ने गरी छिमेकी मुलुक भारत र चीनका साथै अमेरिका,बेलायत र थाइल्याण्डसम्मका राष्ट्राध्यक्षलाई हारगुहार गरेको बताइयो ।

सरकारी हारगुहार अगावै मित्रराष्ट्र चीनले नेपालाई साढे आठ लाख डोज खोप उपलब्ध गराएको थियो भने अन्य धेरै स्वास्थ्य सामाग्री पनि त्यसअघि नै प्रदान गरेको थियो । पछिल्लो पटक थप १० लाख गरी हालसम्म १८ लाख ५० हजार डोज आइसकेको छ । नेपालको जोडबल भने दानमा प्राप्त हुने र किन्ने दुबै खोपप्रतिको ध्यान दक्षिणतिरै देखिन थाल्यो । चीन र रुस खोप बिक्रीको लागि आतुर रहेको सन्देश प्राप्त हुँदा समेत हाम्रो ध्यान त्यसतर्फ गएको छैन ।

यता, महाशक्ति राष्ट्र अमेरिकाले आफूसँग मौज्दात रहेको झण्डै ८ करोड डोज खोप विश्वलाई नै बाँड्ने गरी योजना बनाउँदै थियो । यो उसको रणनीति हो । यो रणनीतिमा कुनै पनि मुलुकले गर्ने विशेष अनुरोधको खासै अर्थ नरहने कूटनीतिज्ञहरूको बुझाई छ । त्यहि क्रममा उसले बिहीबार राती विश्वका विभिन्न मुलुकलाई जुन महिनाभरिमा खोप प्रदान गर्ने बताएको छ । त्यसमध्ये २ करोड ५० लाख डोज खोप तत्काल पठाइने बताइएको छ । त्यसमध्ये एसियाका नेपालसहित १६ वटा मुलुकलाई ७० लाख डोज खोप भनिएको छ ।

तर, राष्ट्रपतिका प्रेस सल्लाहकार ढकालले विना प्रसंग राष्ट्रपतिको आग्रहपछि अमेरिकाले नेपाललाई ५० लाख डोज खोप प्रदान गर्ने भएको घोषणा गरिदिए । त्यसै कारण उक्त घोषणा आधिकारिक नभएकाले नेपालका लागि अमेरिकी राजदूत रेण्डी बेरीले हिजो दूतावासबाट बोल्दै उक्त कुराबाट खण्डन भएको छ । बेरीले भनेका छन् ‘नेपाल सहित १६ वटा मुलुकले ७० लाख डोज खोप पाउनेछन् ।’

यो आधारमा मुलुकको जनसंख्याको आधारमा माल्दिभ्सले २ लाख डोज खोप पाउँदा भारतले कम्तिमा १५ लाख डोज पाउने छ भने नेपालले मुश्किले ४ लाख डोज खोप पाउने देखिन्छ । तर, त्यो समाचार वाशिङटनबाट बाहिरिँदा नबाहिरिँदै यता राष्ट्रपतिका प्रेस सल्लाहकारले संख्या नै किटान गरेर सामाजिक सञ्जालमा लेखिदिए । त्यसैगरी परराष्ट्र मन्त्री प्रदिप ज्ञवालीले अमेरिकी समकक्षी ब्लिकेनलाई विशेष धन्यवाद दिनुभएको थियो ।

तर, त्योभन्दा पाँच गुणा खोप उपलब्ध गराएर धेरै जनालाई सुरक्षित तुुल्याएको चीनको सहयोगप्रति सरकारी अधिकारीहरूले धन्यवाद ज्ञापनको लागि यति धेरै दौडेको देखिएन । जबकी भारतले नै पनि नेपाललाई अमेरिकाले दिनेभन्दा बढी खोप नेपाललाई अनुदानमा उपलब्ध गराइसकेको छ । उसले हामीले खरिदको लागि प्रक्रिया अघि बढाएको खोपको बारेमा भने पेश्कि रकम बुझेर पनि कानुनी अल्झन देखाउँदै रोकेको छ ।

बेमौसममा अर्थहीन ट्वीट गर्ने सरकारी अधिकारीहरूले गत फागुन २३ गतेपछि कोरोन विरुद्धको कोभिशिल्ड पहिलो खोप लगाएका ६५ वर्षभन्दा माथिका लाखौं वृद्धहरूलाई दोस्रो डोज लगाउनेबारे अहिलेसम्म मुख खोलेका छैनन् । तीनलाई लगाइने दोस्रो डोजको खोप जोडजाडमा गरिएको प्रयास भए बरु जानकारी दिएमा वृद्धहरू खुशी हुने थिए की ?