अर्थमन्त्रीको फेसबुकमा टेण्डर आह्वानको सूचना

अर्थमन्त्री तथा एमाले उपमहासचिव विष्णु पौडेलले आफ्नो फेसबुक पेजमा सिध्दार्थ राजमार्गको बुटवल–पाल्पा सडकखण्डमा रहेको सिध्दबाबास्थित सुरुङ मार्ग निर्माणका लागि गरिएको ग्लोबल टेण्डर आह्वानलाई सेयर गर्नुभएको छ ।

भौतिक पूर्वाधार तथा यातायात मन्त्रालयले सुरुङ मार्ग निर्माणका लागि आज प्रकाशित गरेको टेण्डर उहाँले शेयर गर्नुभएको हो । असार २३ गते दिउँसो १२ बजेसम्मको समयसीमा राखेर ग्लोबल टेण्डर आह्वान गरिएको छ ।

उक्त सुरुङ पाँच वर्षमा बनाइसक्नुपर्ने गरी सीमा तोकिएको छ । बारम्बार पहिरो जाँदा सडक आवागमन नै अवरोध हुने गरेको उक्त सडक खण्डमा सुरुङमार्ग निर्माणको लागि अर्थ मन्त्रालयले चालु आर्थिक वर्षमा १० अर्ब रुपैयाँ बजेट छुट्याएको थियो ।

सडक विभागका अनुसार सुरुङ मार्ग पाल्पाको सिध्दबाबा मन्दिर उत्तरतर्फ चिडियाखोलाको छेउबाट शुरु भएर दोभाननजिकै रामापिथेकस पार्कको उत्तरमा निस्कनेछ ।

करिब ५ किमि लामो सुरुङमार्ग आयोजनामध्ये १ हजार १ सय २६ मीटरको सुरुङ,७ सय ८० मीटरको डबल लेन रक सेड हुनेछ भने माथिल्लो भागमा रक नेट,स्लोप प्रोटेक्सनलगायतका कार्यहरु हुनेछन् ।

सिध्दार्थ राजमार्ग पश्चिमको तराईलाई पश्चिमको पहाडसँग जोड्ने मुख्य मार्ग पनि हो । रमाइलो पक्षचाँहि पौडेलको फेसबुक पेज अप्डेट गरिएको छैन र आजसम्म पनि उहाँ नेपाल कम्युनिष्ट पार्टीको महासचिव नै रहेको देखिनुहुन्छ ।

फागुन २३ गते सर्वोच्च अदालतको फैसलाले तत्कालीन माओवादी र एमालेमा विभाजन भएपछि नेकपाको अस्तित्व ऋषि कट्टेलको जिम्मामा गएको छ । त्यसपछि उहाँ एमालेको स्थायी समिति सदस्य हुनुहुन्छ ।