पद खोसिएका जसपा साँसदको रिटउपर भोलि सुनुवाइ

तत्कालीन लुम्बिनी प्रदेश सभा सदस्यले आफूलाई कारबाही गर्ने जनता समाजवादी पार्टी (जसपा)को निर्णय गैरकानुनी रहेको दाबीसहित आइतवार सर्वोच्च अदालतमा रिट दायर गरेका छन् ।

मुख्यमन्त्री शंकर पोखरेलविरुद्ध अविश्वासको प्रस्तावमा हस्ताक्षर गरेरपछि उनैको नेतृत्वमा सरकारमा सहभागी भएका कारण जसपाका प्रदेश सभा सदस्यहरु सन्तोषकुमार पाण्डेय, विजयबहादुर यादव,सुमन शर्मा रायमाझी र कल्पना पाण्डेय कारवाहीमा परेका थिए ।

उनीहरुले आफूलाई उपेन्द्र यादव र बाबुराम भट्टराई समूहले गैरकानुनी रुपमा हटाएको दाबीसहित निर्णय खारेजीको माग गरेका छन् । यसअघि कोभिडको कारण न्याय सेवा प्रवाहमा संकुचन ल्याइएको कारण दर्शाउँदै फिर्ता पठाइए पनि आइतवार रिट दर्ता गरिएको छ ।

मुख्यमन्त्री पोखरेलविरुद्ध अविश्वासको प्रस्ताव दर्ता भएपछि यी साँसद सरकारमा सामेल भएका थिए । लुम्बिनी प्रदेशसभा सचिवालयले चारै जनालाई पदमुक्त गरिएको सूचना निकालेको छ ।

रिटमा कारवाहीको निर्णय कार्यान्वयन नगरी यथास्थितिमा राख्न अन्तरिम आदेशको माग गरिएको छ ।