मुख्यमन्त्री दाबी गर्दै चार दलका नेता प्रदेश प्रमुखको कार्यालयमा

गण्डकी प्रदेशमा नयाँ सरकारको दाबी गर्दै नेपाली कांग्रेस, माओवादी केन्द्र,जनता समाजवादी पार्टी (जसपा) र राष्ट्रिय जनमोर्चाले प्रदेश प्रमुखलाई पत्र बुझाएका छन् ।

चार दलीय गठवन्धनले बहुमतको दावीसहित भर्खरै प्रदेश प्रमुख सीताकुमारी पौडेललाई पत्र बुझाएको हो । पत्रमा कांग्रेस संसदीय दलका नेता कृष्णचन्द्र नेपालीलाई मुख्यमन्त्रीमा प्रस्ताव गरिएको छ ।

मुख्यमन्त्री पृथ्वीसुब्बा गुरुङले आफूविरुद्धको अविश्वास प्रस्तावमा मतदान हुनुअगाडि नै राजीनामा दिएपछि संविधानको धारा १६८ को उपधारा २ बमोजिम सरकार गठनका लागि प्रदेश प्रमुखले दिएको समयसीमा सकिनै लाग्दा विपक्षी गठवन्धनका नेताहरु पत्र लिएर प्रदेश प्रमुखको कार्यालय पुगेका हुन् ।

६० सदस्यीय प्रदेशसभामा सरकार गठनका लागि ३१ मत चाहिन्छ । विपक्षी गठवन्धनसँग ३१ मत प्रष्ट देखिएकोमा जनमोर्चा संसदीय दलका नेता कृष्ण थापा पार्टी निर्णयविरुद्ध उभिएका थिए । थापा तटस्थ बस्ने भएपछि संख्या पुगेको दाबीसहित उनीहरुले पत्र बुझाएका हुन् ।

थापालाई जनमोर्चाले संसदीय दलको नेताबाट आजै हटाएको थियो ।