एमाले युवा संघका दुई जना केन्द्रीय सदस्य कोरोनाबाट बिते

कोभिड–१९ का कारण राष्ट्रिय युवा संघ नेपालका दुई जना केन्द्रीय सदस्यको निधन भएको छ । प्राप्त समाचारमा जनाइएअनुसार मिलन सापकोटा र निमा लामाको निधन भएको हो ।
उनीहरु काभ्रेको रोशी गाउँपालिकाका वासिन्दा हुन् ।

काभ्रेमा हिजो र आज चार जनाको दरले दुई दिनमा आठ जना संक्रमितको निधन भएको छ । निधन हुनेहरुमा अधिकांश युवा उमेरका छन् । उनीहरुमध्ये एक जना २४, अर्को ३० र अर्का ३३ वर्षका हुन् ।

आइसीयु र अक्सिजनको अभावमा संक्रमितहरुको निधन भएको बताइन्छ । काभ्रेमा कोभिडको उपचार धुलिखेल अस्पताल,शीर मेमोरियल अस्पताल र मेथिनकोट अस्पतालमा मात्र गरिन्छ । १५ शैयाको मेथिनकोट प्रादेशिक अस्पताल हो ।

काभ्रेमा अक्सिजन उत्पादन प्लाण्ट भएपनि अधिकांश काठमाडौंका ठूला अस्पतालमा आपूर्ति हुने गरेको छ । काभ्रेमा दैनिक ४ सय सिलिण्डर अक्सिजनको माग छ । तर,८० सिलिण्डर मात्र कोटामा पाइएकाले संक्रमितहरु अक्सिजनको अभावमा मृत्युवरण गर्न बाध्य भएका हुन् ।

– मोतिराम तिमिल्सिनाबाट