गुण अप्ठ्यारोमा साथ,केपी ओलीको हात

नेकपा फुटाएर गुन लगाउने न्यायाधीश कुमार रेग्मीका दाजुलाई संवैधानिक निकाय लोकसेवाको अध्यक्ष नियुक्ति दिएकै शैलीमा अर्काे कर्मचारीले संवैधानिक आयोगको जिम्मेवारी पाएका छन् ।

प्रधानमन्त्री ओलीको ५ पुसको प्रतिनिधिसभा विघटनअगाडि सँसद अधिवेशन आह्वानको समावेदन पत्र बोकेर भीम रावल र पम्फा भुसाल शीतलनिवास पुग्दा छ घण्टासम्म मोबाइल अफ गरी गायब भएर प्रधानमन्त्री ओलीलाई सघाएवापत राष्ट्रपति कार्यालयका सचिव डा. हरि पौडेललाई अख्तियार दुरुपयोग अनुसन्धान आयोगको आयुक्त बनाइएको छ ।

हिजो बिहान बालुवाटारमा बसेको संवैधानिक परिषद्को बैठकले विभिन्न निकायमा रिक्त २० जनालाई नियुक्त गरेको हो । जसअनुसार,लोकसेवा आयोगमा कपिलवस्तु स्थायी घर भएका माधव बेलबासे,पूर्व निर्वाचन आयुक्त वीरबहादुर राई, ललितपुरका दिनेश सिलवाल र महोत्तरीका मन्जुकुमारीले ठाउँ पाएका छन् ।

यस्तै अख्तियार दुरुपयोगमै राष्ट्रिय योजना आयोगकी पूर्व सदस्य तथा कम्युनिस्ट नेता तुलसीलाल अमात्यकी बुहारी सुमित्रालाई नियुक्त गरिएको छ ।

निर्वाचन आयोगमा रुपन्देहीका सगुन समशेर जबरा परेका छन् भने राष्ट्रिय प्राकृतिक स्रोत तथा वित्त आयोगको सदस्यमा पाँचथरका विपिनराज निरौला र सुधाकुमारी झाको नाम सिफारिश भएको छ ।

महिला आयोगमा धनुषाकै जया घिमिरे र पर्वतकी सावित्राकुमारी शर्मा सिफारिस भएका छन् । दलित आयोगमा सुन्दर पुर्कुटी, राष्ट्रिय समावेशी आयोगको अध्यक्षमा डा.रामकृष्ण तिमिल्सिना र सदस्यमा पर्वतका पुष्पराज तिमिल्सिना,मानप्रसाद खत्री सिफारिस भएका छन् ।

आदिवासी जनजाति आयोगमा सूर्यबहादुर गुरुङ,मधेशी आयोगमा आभा कुमारी,थारु आयोगमा डा. उमाशंकर चौधरी र मुस्लिम आयोगमा मोहम्मद समसुल हक सिफारिस भएका छन् ।