प्रधानमन्त्रीले निर्माणाधीन सिटी हल पनि उद्घाटन गर्ने

प्रधानमन्त्री केपी शर्मा ओलीले ललितपुरको गोदावरीमा निर्माणाधीन नेपालकै सबैभन्दा ठूलो सम्मेलन हल ‘सिटीबहल’ को उद्घाटन गर्न लाग्नुभएको छ ।

कम्तिमा ३ हजार जना अटाउने उक्त हलमा दुई वटा भीभीआईपी कक्ष बनाइएको छ । गत चैतमा सम्पूर्ण काम सकिनुपर्ने हलको निर्माण कार्य अझै धेरै बाँकी छ ।

६५ करोड ७४ लाख ८७ हजार २ सय ९१ रुपैयाँ भनिएको हलको लागत भेरिएसनसहित ८१ करोड, ६ लाख ४ सय ३ रुपैयाँ पुगेको छ ।

स्रोतकाअनुसार आन्तरिक सडक, बगैंचा तथा हरियाली,कुर्सी व्यवस्थापन,हल सजावटलगायतका महत्वपूर्ण कामहरू बाँकी नै छन् । तर, प्रधानमन्त्रीबाट जसरी पनि उद्घाटन गर्नुपर्ने भन्दै शहरी विकास मन्त्री प्रभु साह हिजो एकाएक सिटी हल निर्माणस्थल पुग्नुभएको थियो ।गोदावरी नगरपालिका ३ स्थित ४३ रोपनी १५ आना क्षेत्रफल जग्गामा बनाइएको सिटी भवनको भौतिक संरचनाले मात्रै ११ रोपनी १३ आना जग्गा चर्चेको छ ।

३ रोपनी क्षेत्रफल आन्तरिक सडक,१६ रोपनी २ आनामा बगैंचा तथा १३ रोपनीमा पार्किङ्ग र अन्य कार्यका लागि छुट्याइएको छ ।