प्रधानमन्त्रीले फाल्नुभयो कोरोनाको सुरक्षा कवच

प्रधानमन्त्री केपी शर्मा ओली छिन छिनमा उत्पन्न नयाँ राजनीतिक परिस्थितिलाई विश्लेषण गर्दै प्रधानमन्त्री निवासमा बनाइएको विशेष सुरक्षा कवच छाडेर दलबलसहित बूढानीलकण्ठ पुग्नुभएको छ ।

आगामी सोमबार उहाँले प्रतिनिधिसभाबाट विश्वासको मत लिन लाग्नुभएको छ । आफ्नो राजनीतिक योजना र अंकगणित विपरितको परिस्थिति उत्पन्न भएको निश्कर्ष निकालेपछि उहाँ अघि काँग्रेस सभापतिको निवास जानुभएको हो ।

बढ्दो कोरोना महामारीलाई ध्यानमा राखेर दीर्घ रोगी,बृद्ध र बालबालिकालाई घरभित्रै बस्न उहाँको सरकारले आग्रह गरिरहेको छ । त्यसैलाई मध्यनजर गर्दै पछिल्लो सातादेखि प्रधानमन्त्री निवासको बैठक कोठामा संक्रमणबाट उहाँलाई जोगाउन विशेष सुरक्षा कवच बनाइएको छ ।

तर,आज सुरक्षा दस्ता,पार्टीका केही नेतासहित राजनीतिक वार्ताको निम्ति देउवा निवास पुग्नुभएका प्रधानमन्त्रीले अब फेरि बालुवाटार फर्केपछि हुने वार्ता र छलफलमा उक्त कवचको प्रयोग गर्नुहुन्छ वा हुँदैन होला ?

मन लाग्दा मज्जाले बाहिर निस्कने र घरभित्र छँदा कवचको प्रयोग गर्ने हो भने आमनागरिकले सरकारले भन्दै आएको स्वास्थ्य सुरक्षा मापदण्ड पालनालाई कसरी बुझ्ने होला ?