स्वास्थ्यकर्मीको भएन उद्धार,हेलिकोप्टर जान मौसम खराब

तीन दिनदेखि डोल्पाको उत्तरी क्षेत्र डोल्पोबुद्ध गाउँपालिकाको केन्द्र धोमा सिकिस्त बिरामी परेका चारजना कर्मचारीको अझै उद्धार हुन सकेको छैन ।

बिरामीले थला परेका स्वास्थ्य संयोजक सुरेन्द्र बिक,प्राविधिक खेमराज सिंह,प्राविधिक माधव पुन र तिन्जे स्वास्थ्य चौकी प्रमुख दिक्पाल रोकायको उद्धार हुन नसकेको बताइएको छ ।

हिँडेर दुनै पुग्ने अवस्था नभएकाले हेलिकोप्टरबाट उद्धारकालागि मंगलबारदेखि पहल गरिए पनि मौसममा आएको खराबीले काठमाण्डौबाट हेलिकोप्टर आउन नसकेको गाउँपालिकाका प्रमुख प्रशासकीय अधिकृत गौतम पंगेनीले जानकारी दिनुभएको छ ।

कार्यालयको कामको सिलसिलामा बैशाख ४ गते उपल्लो डोल्पा हिँडेका बिरामी कर्मचारीहरू रुखाखोकी,ज्वरो आउने,शरिर दुख्ने र सास फेर्न गाह्रोहुने समस्याले सिकिस्त भएको पंज्ञानीको भनाई छ ।

उहाँका अनुसार गाउँपालिकाकै खर्चमा हेलिकोप्टर झिकाउन निरन्तर लागिरहे पनि मौसमले साथ नदिएकाले मान्छे र घोडामा बोकाएर भएपनि जतिसक्दो दुनै नजिक झार्ने प्रयास भइरहेको छ ।

पंगेनीले स्वास्थ्य संयोजक विकको अवस्था अत्यन्त जटिल रहेको बताउनुभयो । बिरामीहरूमा कोभिड जस्तो लक्षण देखिए पनि उपल्लो डोल्पामा परीक्षणको कुनै माध्यम नभएकाले यकिन गर्न नसकिएको बताइन्छ ।