राजधानी नजिकै कोरोना संक्रमणदर ९० प्रतिशत देखियो, पनौतीको एउटा वडा पूरै शिल

काभ्रपलाञ्चोकको पनौती नगरपालिकाको एउटा वडामा कोरोना संक्रमणदर ९० प्रतिशत भेटिएको छ । बिहीबार नगरपालिकाको अनुसन्धान तथा खोजपड्ताल टोलीले १० नम्बर वडाका १० जनामा गरेको परीक्षणमा ९ जनाको रिपोर्ट पोजिटिभ आएको बताएको छ ।

हिजो गरिएको परीक्षणको रिर्पोट आज बिहान आएको हो । उक्त रिपोर्टको आधारमा पनौतीमा संक्रमणदर ९० प्रतिशतले उकालो लागेको भन्न सकिने टोलीका एक जना सदस्यले बताएका छन् ।

पनौती नगरपालिकाको स्वास्थ्य शाखा प्रमुख पुरुषोत्तम तिमिल्सिनाका अनुसार वडा नम्बर ३ मा तीन महिला र तीन पुरुष गरी ६ जना, वडा नम्बर ८ मा २ जना पुरुष तथा वडा नम्बर ९ मा १ पुरुष गरी थप ९ जनामा संक्रमण पुष्टि भएको छ ।

पछिल्लो दुई दिनको अन्तरालमा जनप्रतिनिधिसहित २९ जनामा कोरोना संक्रमण र एक महिलाको निधन भएपछि पनौती नगरपालिकाको वडा नम्बर १० हिजोदेखि अनिश्चित कालका लागि शिल गरिएको छ ।

शिल गरिएको क्षेत्रमा भेटघाट, उद्योगधन्दा, शुभ कार्य, सभा–समारोह नगर्न आग्रह गरिएको छ ।