काँग्रेसी नेताहरूले भने ‘हाम्रो संलग्नता छैन’

काठमाडौंको बूढानीलकण्ठमा जग्गा प्लटिङको नाममा नेपाली काँग्रेस रामेछापका नेता, कार्यकर्तासँग ठूलो रकम उठाइएको विषयमा आफूहरूको कुनै संलग्नता नभएको स्थानीय भरत चौंलागाई, जीतबहादुर मगर र विनिता खड्काले बताएका छन् ।

तीनजनाले प्रकाशित गरेको संयुक्त खण्डनमा भनिएको छ ‘जनआस्थामा बैशाख ७ गते प्रकाशित समाचारमा हाम्रो संलग्नता नभएको र समाचारको उक्त अंशमा कुनै सत्यता नरहेकोले खण्डन प्रकाशित गरिदिनुहुन अनुरोध छ ।’

काठमाडौंमा वन प्लस वन कम्पनी खडा गरेर प्रत्येक घडेरीको लागि धेरै जनासँग न्यूनतम १० लाख रुपैयाँको दरले पेश्की उठाइएको पिडितहरूले बताउँदै आएका छन् । यसबीचमा पिडितहरूले पैसा फिर्ता नपाएको र जग्गा समेत नपाएपछि ठगिएको समाचार बाहिरिएको हो ।

चैत २८ गते नेपाली काँग्रेस, रामेछाप–काठमाडौं सम्पर्क समितिले मध्य बानेश्वरको म्याकडोनाल्ड क्याफेमा आयोजना गरेको रक्तदान कार्यक्रममा उक्त जग्गा दलाली काण्ड र जिल्लाका अधिकांश नेता ठगिएको रहस्य पटाक्षेप भएको थियो ।

प्रमुख अतिथि रहेका पूर्वमन्त्री मिनेन्द्र रिजालको सामुन्ने नेताहरू मिलेर रामेछापका अधिकांश काँग्रेसी ठगिएको घटना सार्वजनिक भएपछि त्यहाँको स्थिति तनावग्रस्त भएको थियो । ठगिनेमा कतिपय स्थानीय तहका जनप्रतिनिधिसमेत छन् ।

वान प्लस वानको नाममा कम्पनीको अध्यक्ष भनिएकी चाबहिलकी शोभाकुमारी श्रेष्ठ र राजनकुमार श्रेष्ठले रामेछाप नगरपालिकाका मेयर नरबहादुर थापा मगरसँग १२ लाख ५० हजार, रामेछापकै उमाकुण्ड गाउँपालिका उपाध्यक्ष उर्मिला कार्कीसँग २५ लाख रुपैयाँ लिएका थिए । उमाकुण्ड गाउँपालिकाका अरु तीन जनासँग पनि ठूलै रकम उठाएको बुझिएको छ ।

उनै उर्मिलाका देवर देवराज बस्नेतसँग १२ लाख ५० हजार रुपैयाँ लिएको बताइन्छ ।
नेपाली काँग्रेसको १३औं महाधिवेशनमा निर्वाचन अधिकृतको रुपमा काम गरेका सीताराम केसीसँग भने उक्त कम्पनीले ७० लाखभन्दा बढी लिएको बताइन्छ । सबैभन्दा बढी गगन थापा मगरसँग १ करोड १५ लाख रुपैयाँ लिएको पीडितहरूले दाबी गरेका छन् ।