‘हाम्लाई खोप किन नलगाउने ?’ भन्दै सैनिक अस्पतालमा विवाद

नेपाली सेनामा कार्यरतका परिवारलाई कोरोनाविरुद्धको खोप नलगाइएको सम्बन्धमा आज सैनिक अस्पताल छाउनीमा विवाद भएको छ । अस्पतालमा रहेको कोभिड–१९ खोप केन्द्रमा सैनिक परिवारलाई खोप नलगाएपछि उपस्थित परिवारका सदस्यले ‘हाम्लाई खोप किन नलगाउने ?’ भन्दै कराएका थिए ।
खोप लगाउने वा नलगाउनेबारे चर्को आवाज उठेको र महासेनानी प्रा.डा.सुनिता पन्तले सैनिक परिवारलाई समेत खोप खुल्ला गरिएको जानकारी गराएपछि विवाद समाधान भएको बताइएको छ ।
अस्पताल स्रोतले छाउनीबाट कोरोना विरुद्धको खोप लगाउनेको संख्या झण्डै दुई हजार पुगेको बताएको छ । जसअनुसार कार्यरत सैनिक पाँच सय ५४ जना, सैनिक परिवार एक सय एक जना, सर्वसाधारण ९ जना,सेवानिवृत्त सैनिक एक सय ३० जना, सेवा निवृत्त सैनिक परिवार एक सय ५८ जना रहेका छन् ।
त्यसैगरी, सर्वसाधारणको बुथमा दोस्रो खोप लगाउने कार्य आजबाट बन्द गरिएको बताइएको छ । पछिल्लो विवरणअनुसार खोप लगाउनेमध्ये पहिलो डोज नौ सय ५२ जना र दोस्रो डोज ५२ जनाले लगाएका छन् ।
अस्पतालले हालसम्म संक्रमित बिरामीको संख्या आठ सय ११ जना पुगेको र तीमध्ये सक्रिय संक्रमित अझै २८ जना रहेको बताएको छ । त्यसैगरी हालसम्म मृत्यु हुनेको संख्या ५० जना पुगेको छ भने निको भई घर फर्केकाको संख्या सात सय ३६ जना पुगेको छ । अस्पतालमा हाल उपचारार्थ रहेका संक्रमितको संख्या ३३ छ ।