अदालतले ठेल्ने,ओलीले पेल्ने

छिटो न्यायिक निकास निस्कोस् भन्ने अभिप्रायसहित गत हप्तादेखि अनेक प्रयास गर्दै बल्लतल्ल दर्ता गरिएको माधवकुमार नेपालसहित चार जनाको रिटलाई सर्वोच्च अदालतले आज ३१ औं नम्बरमा पेशी चढाएको छ भने एमालेको प्रधानमन्त्री पक्षले आजै आफ्ना वरिष्ठ नेताहरुमाथि कार्वाहीको निम्ति केन्द्रीय कमिटीको आकस्मिक बैठक बोलाएको छ । न्यायाधीश प्रकाशकुमार ढुंगानाको एकल इजलासमा सबैभन्दा पुच्छारको अन्तिम दोश्रो नम्बरमा राखिएको मुद्दाउपर आज पालो आउने सम्भावना छैन । अर्को पेशी चढ्दासम्म प्रतिनिधिसभाका केही सदस्यको पद खाइसक्ने तयारी छ । सामान्यतया बिषयको गम्भीरता हेरी यस्ता रिटलाई एक,दुई नम्बरमै राखेर आदेश दिने परम्परा यसचोटि तोडिएको हो । कानूनविदहरु भन्छन्, ढिलो गर्नु न्याय नदिनु बराबर हो ।