खोजेको विमलेन्द्र, भेटिए मीनेन्द्र

सायद बुढेसकालले छोएर होला, अरू समय दुई पेग रेडवाइन लिएको बेला झोंक्किने कांग्रेस सभापति शेरबहादुर देउवाले अचेल नपिएको समयमा पनि उस्तै रिस देखाउन थाल्नुभएको छ ।

विस्तारै बुढ्यौलीले छोप्दै गएपछि बोलेको कुरा बिर्सने र सहयोगीलाई झपार्ने काम बढ्दो छ । त्यही भएर होला गत हप्ता आफ्नै निवास बूढानीलकण्ठमा थापा थरका आफ्ना अंगरक्षकलाई मीनेन्द्र रिजाललाई फोन लगाउन अह्राउनुभयो ।

अंगरक्षकले फोन लगाएर दिए । केही कुरा भयो । तर, फोन राख्नै नपाई उल्टै हकारियो । भन्दै हुनुहुन्थ्यो– ‘मैले विमलेन्द्रलाई फोन लगाऊ भनेको होइन ?’ सभापतिको गालीबाट अंगरक्षक थापा अक्क न बक्क भए ।

उनले जवाफ फर्काए, ‘हजुरले मीनेन्द्र दाइलाई फोन लगाऊ भन्नुभएको होइन र !’ देउवापत्नी आरजुले यो संवाद सुनिरहेकी थिइन् । उनले भनिन्, ‘अँ, हजुरले मीनेन्द्रलाई फोन गर्न भनिस्या हो ।’

अन्य सहयोगीले पनि सभापति बेलामौकामा यसरी झुक्किने गरेको र सहयोगीहरूलाई अनायासै झपार्ने गरेको पीडा सुनाउने गरेका छन् ।