ओलीमा हिटलर प्रवृत्ति रहेको माधव नेपालको दाबी

नेपाल कम्युनिष्ट पार्टी (एमाले) का वरिष्ठ नेता माधवकुमार नेपालले प्रधानमन्त्री केपी शर्मा ओलीमा हिटलर प्रवृत्ति रहेको टिप्पणी गर्नुभएको छ ।

नेपाल पत्रकार महासंघ,काठमाडौं शाखाले आयोजना गरेको नवनिर्वाचित कार्यसमितिको पदस्थापन तथा बधाई कार्यक्रममा बोल्ने क्रममा नेपालले पार्टी अध्यक्षसमेत रहनुभएका प्रधानमन्त्रीतर्फ सङ्केत गर्दै उहाँको शैली हिटलरी भएको बताउनुभएको हो । उहाँको भनाई छ ‘जसले प्रधानमन्त्री बनाउन भर्याङ चढाए,उसैलाई लात हानेर सडकमा पुर्याए ।’

प्रधानमन्त्री ओलीले केही खास मान्छेलाई किनेर भजनमण्डली बनाएको आरोपसमेत उहाँले लगाउनु भएको छ । नेपालले भन्नुभयो ‘खासखास मान्छेलाई किनेर आफ्नो पक्षमा भजनमण्डली बनाएर त्यसको माध्यमबाट प्रचार गरेर पनि हुँदैन । त्यो प्रचार होइन कुप्रचार हुन पुग्दछ र कुप्रचारको अन्त्यमा पतन हुन्छ । हिटलरले पनि यस्तै कोसिस गरेको थियो ।’

नेता नेपालले राम्रो भूमिका निर्वाह गर्दागर्दै पनि आफ्नो समर्थनमा नदेखिएपछि प्रधानमन्त्री ओलीले संसदलाई नै घाँडो ठानेको समेत बताउनुभयो ।

त्यसैगरी आफ्नो आदेश पालना नहुँदा प्रधानमन्त्री तथा एमाले अध्यक्षले पार्टी नै भत्काउने कोसिस गरे पनि नेपाली जनतामा त्यसको सामना गर्ने क्षमता रहेकाले अन्त्यमा गलत प्रवृत्तिको हार हुने उल्लेख गर्नुभएको छ ।